Pynthikna u CM ban nym pyntreikam ia ka Uniform Civil Code ha Meghalaya

‘Ka UCC kam dei kaba lah ban leh ne iahap ban leh”

Shillong, K’lyngkot 30: U Myntri Rangbah ka jylla u Conrad K. Sangma ha ka sngi Palei ula ong ba ka jingpyntreikam ia ka Uniform Civil Code (UCC) kam long kaba iahap ne kaba biang namar ba ka ri ka dei kaba don bun jait ki kolshor bad ki jaidbynriew bapher.

U la ong ba ka UCC kum ka jingmut bad ka UCC kum ka bill ne ain ba kyrpang ki dei ar tylli ki bynta ba kyrpang kiba ym dei ban pyniasoh lang.

“Ka Uniform Civil Code, ka dei ka jingthmu ban pynlong ia kiei kiei baroh kiba ryntih lang, kam long kaba iahap hapoh ka ri India. Ki don ki riewlum bad ki trai ri trai muluk kiba don ia ki jingleh kiba kyrpang, kiba lah ban ym iahap bad katei ka jingpyniaid ryntih lang. Ban pynjari iaka jingiaryntih lang ha man la ki bynta jong ka jingim, ia baroh ki jaidbynriew kam long kaba dei” ong u Myntri Rangbah.

Ula kubur ba ki don katto katne ki bynta jong ka ain kiba iadei hapdeng u riewshimet bad ka imlang sahlang kidei kiba lah ban shna ban iada ia ka hok jong ki jaidbynriew trai ri.

Haba kdew ia ka Uttarakhand, kaba la long ka jylla kaba nyngkong ban pyntreikam ia ka UCC hynrei kam shym la kynthup pat ia ka Custom ne ka jingleh tynrai jong ki riewlum ha katei ka bynta.

“Lada ia ka Bill ha ka ri ne ki jylla hap ban pynbna ba ha ka ri baroh kawei kadei ban shim jait na ka kmie, ka jylla Meghalaya kan kyrshan ia kane, namar ngi dei ka jaidbynriew kaba shim jait na ka kmie. Kan shong baroh ha ka rukom pynwandur ia ka Bill, kiei ki bynta kiba la thaw ban don ia ka jingryntih lang bad ha kano ka lynti” ula ong.

Ula pynpaw ba ka jylla Meghalaya kam don jingthmu eiei ban pyntreikam ia ka UCC.

“Ia ngi kum ka sorkar jylla, ngi long kiba shai, ba ka Uniform Civil Code kam don satia ha ka mat treikam ka jong ngi. Ngi burom ia ka jingdon ia ki jinglong tynrai kiba kyrpang jong ki jaidbynriew bad ia ka dustur tynrai ka jongki dei ban ai jingiada” la ong u Conrad.

Kane ka jingkren ka jong u Myntri Rangbah kadei hadien ba ka jylla Assam kala pynpaw ia ka jingthrang ban bud ia ki nuksa jong ka jylla Uttarakhand ha kaban pyntreikam ia ka UCC.