Shillong, K’lyngkot 30 : Ka Kynhun Myntri ka Sorkar Jylla ha ka sngi Palei, kala ai jingmynjur ia ka Ordinance ban pynheh ia ka song pisa jong ka Contingency Fund ka Meghalaya sha ka T.1005 klur.
Haba pyntip ia kane hadien ka jingialang, u Myntri Rangbah ka Jylla Conrad K Sangma ula ong “Ngi la mynjur ia ka Ordinance jong ka Contingency Fund ka Meghalaya bad ka song na ka bynta ka corpus fund la pynkiew sha ka T.1005 klur ban lah pyndap pynbiang ia ki jingdawa kiba mih tam”.
Haba batai ia ki daw ha lyndet kane ka rai, u Conrad ula ong “Ka Contingency Fund ka dei ka kynhun hapoh ka rukom mang tyngka jong ka Sorkar, ba hadien ba ka mang tyngka kaba la mynjur da ka Iingdorbar kala lut na ka bynta kano kano ka tnad, ka dei ia ki ban wanrah ia ka supplementary demand khnang ban lah pynlut khambun lada donkam bad haba ia ka supplementary demand ruh dei ban mynjur da ka Iingdorbar, ka Contingency Fund ka shah ban pyndonkam ia kane ka kynhun (ban pynlut khambun lada donkam)”.
