Nongstoiñ, K’lyngkot 29: Ka samla Lilyiora Wahlang 21 snem ka karta kaba shong ba sah ha ka dong Mawbyrshem shnong New Nongstoiñ, ka don ha ka jingpynkhreh ban ïoh leit pule Nurse sha Bangalore hadien ba ka la pyndep ïa ka Class XII Science, hynrei, kyndit kynsan ha ka 20 tarik K’lyngkot, kane ka samla ka la duh noh ïa la ka jingim ha ki briew thrang snam, kiba la dkhat jubor ïa ka jingim ha Wahriat.
Katkum ka jingïathuh ka kmie, ka ïing ka sem ki dang pynkhreh ban pynbit pynbiang ïa ki jingdonkam ban ïoh phah ïa ka sha Bangalore satang katto katne por, pynban u lyoh bad dum u la wan tap noh ïa ka ïing ka sem bad duh noh ïa kane ka khun tip sngi.
La ong ba hadien ka jingjia shah pynïap kaba la jia ha ka 20 tarik, na ka liang ka ïing ka sem ki la dep ban ujor ejahar sha ki pulit kiba la pynthikna ruh ba kane ka dei ka jingjia shah pynïap (murder case).
Namar kata, ka ïing ka kyntu ia ki bor ba halor naduh u MLA, MDC, u DC bad SP, nangta ki kynhun seng trei mon sngewbha, ba kin sngewbha ban shimkhia lem ïa kane ka jingjia, khamtam ban thwet tyngeh ïa u briew lane ki briew ba don kti, khnang ba ka khun kan ïoh ïa ka hok bad ba ka jingïoh.
