Wahiajer, K’lyngkot 28: Ka Shillong Lajong kala jop da ka Tie breaker da 4-3 pyrshah ia ka Rymbai Shkenshynriah ha ka jingiakhun ia ka Semifinal jong ka Meghalaya State League 2024 bad mynta kala ioh rung syndon shaka Final ban iakhun pyrshah ia ka Mawlai ha ka sngi Saitjain.
Ka jingiakhun hapdeng kine ki ar tylli ki kynhun kala kut noh da ka jingiakhiad da kaba ia thep mar shi kol, ha kaba Iohborlang L Lyngkhoi ula thep ia ka kol lyngba ka jingshut ia ka free-kick ha ka minit kaba 84, watla ka Ljong kala don ia ka jingmut ba kan jop ia katei ka jingiakhun hynrei ha ka minit kaba 87 u Niwan-o Bareh ula thep ia ka kol kaba ula shut lyngba ka penalty hadien ba u nongialehkai ka Lajong ula ioh ktah da ka kti ia ka bol.
Kane ka jingioh thep kol u Niwan kala pyniakhiad syndon ia ka jingiakhun hapdeng ka Lajong pyrshah ia ka Rymbai Shkenshynriah kaba la pynshongshit ruh ia ki paidbah kiba la wan ban sakhi ia kane ka jingialehkai.
Kumta hadien kane la pynlong ia ka extra time hynrei kine baroh artylli ki kynhun kim shym la lah ban thep kol haduh ban da kut ka jingialehkai, kumta ban rai jop ia ka kynhun ban ioh rung sha ka Final la pynlong da ka Te Breaker.
Hynrei ha ka jingshut Tie Breaker ka Ljong kala ioh thep 4 kol katba ka Rymbai Shkenshynriah kala ioh thep 3 kol.
Ka jingiakhun ia ka phainal jongka MSL kan long ha ka sngi Saitjain ha Wahiajer Multipurpose Sports Complex.
Ka Mawlai kala pynrem ia ka Ladthadlaboh na West Jaintia Hills da 1-0 ha ka Semi Final bad ka Mawlai kan iakhun tyngeh ban iohrah ha ka sien kaba nyngkong eh ia ka nam lahduh jong ka MSL, katba ka Lajong kaba la jop teng kan ialeh ban bteng ban khur biang ia ka nam lahduh kumba kala rah ha u snem 2019.
