Guwahati, Nailar 27 : Ka Akhil Bharatiya Vidyarthi Parishad (ABVP) kam don satia ia kano kano ka jingiadei bad ka BJP bad ki long laitluid ban kyntu ia ki paidbah ba kin ym kyrshan ia u lada ki kwah ban leh kumta, ong u Myntri Rangbah (CM) ka Assam, u Himanta Biswa Sarma.
“Ka ABVP kam dei ka bynta jong ka BJP bad kam don ruh ia kano kano ka jingiateh bad kane ka saffron party. Ki briew ki sngewthuh bakla ha kaba iadei bad ka ABVP ba ka dei ka bynta jong ka BJP, hynrei kam shym la dei satia. Ki lah ban pynlong ia ka jingiakhih katba ki mon, hynrei ngam lah ban leh ei ei. Ki lah ruh ban kyntu ia ki paidbah ba kin ym kyrshan ia nga lada ki kwah,” ong u Sarma sha ki lad pathai khubor.
Kane ka jingpynpaw jong u CM Sarma kala wan long ruh hadien ba ka seng ABVP ka la pynlong ka jingiakhih halor ka jingshim rai jong ka kynhun myntri ka Assam na ka bynta ban hikai noh da ka ktien English ha ka sobjek Science bad Mathematics ha ka jaka jong ka ktien Assamese lane kiwei pat ki ktien kiba dei jong ki jaitbynriew ka jylla hapoh ki skul sorkar ka jylla.
Ka kynhun myntri ka sorkar Assam dang shen kala mynjur ba naduh mynta ia ka sobjek Maths bad Science yn hikai noh ha ka ktien English ha baroh ki skul sorkar naduh ka klas 3 haduh ka klas 12, kata ha ka jaka jong ka ktien Assamese, Bodo, lane Bengali ia kiba la ju pyndonkam.
Na ka liang ka ABVP kala pynpaw pyrshah ruh ha kaba iadei bad kane ka jingshim rai jong ka sorkar Assam da kaba kyntu ruh ba kan pynkylla pat ia ka rai ka jong ka.
Ka ABVP ka dei ka kynhun ki samla pule kaba don ka jingiateh bad ka Rashtriya Swayamsevak Sangh (RSS), kata ka kynhun kaba la seng nongrim ia ka BJP.
