Shillong, K’lyngkot 20 : Ka Catholic Association of Shillong Archdiocese ha ka sngi Nyngkong kala pynpaw ia ka jingpynrem kaba jur halor ka jingkynnoh wiang ding ia ka Iingmane Catholic bala 75 snem hapoh ka thain Ambagaon jong ka Udalguri District ka Assam, kaba la jia ha ka miet 15 tarik K’lyngkot 2025.
Ha ka kyrwoh, u President ka Association Bah VH Pala ula ong “Kane ka jingjia kaba shyrkhei ka la dung ia ka mynsiem ka jingsngew ba ngi don ka jingiaieid bad jingburom ia ki niam bad ka jingia im lang iasah lang. Ka Iingmane kam dei tang ka jingtei-ka dei ka jaka ba kyntang ba ngi pyndem ialade ha ki jingduwai, ban ioh ia ka jingpyntngen bad ban ialum lang shi jaka”.
U Bah Pala ula ong ba ka jingpynjot pynjulor ia kane ka jaka ba kyntang kam dei tang ka jingleh bym hok ia ki paid riewngeit Catholic hynrei ka dei ruh ka jingpyniap ia ka nongrim ka jingiatylli bad ka jingburom kaba tehsong ia ka imlang sahlang ba bun ki Jaidbynriew.
“Ngi kyntu ia ki borkhmih ka Assam ba kan leh eiei marmar da kaba pynlong ia ka jingtohkit kaba bniah bha, ban ithuh ia ki briew ba donkti, bad pynthikna ba ka jingbishar ba hok ka ieng rasong. Ka long kaba donkam eh ban shim ia ki lad ki lynti ha kaban ai jingiada ia baroh ki Iingmane bad jaka leh niam bad ban pynieng rasong ia ka hok ba laitluid ban mane Blei bala pynkup bor da ka Riti Synshar ka Ri”
Ka Catholic Association of Shillong Archdiocese ka phah ruh ia ki jingduwai bad ka jingiadon ryngkat bad ki riewngeit kiba shah ktah na kane ka kam kaba sngewsih.
“Ngi wer ruh ia ki paidbah na ki niam bapher bapher ba kin ieng tylli ha kaban pynrem ia kane ka kam thimbor bad ban pynskhem biang ia ka jingkut jingmut jong ngi na ka bynta ka jingsuk, ka jingieid, ka jingburom markylliang.
