Shillong, K’lyngkot 18 : U Lat ka Jylla CH Vijayashankar ha ka sngi Saitjain, ula ban jur ia ka jinglong kongsan ka jingai jait sha ka Kmie (Matrilineal system) ha Meghalaya, kaba long u budlum jong ki paid Khasi, Jaintia bad Garo.
Ula kren ia kane ha ka “Dorbar Iktiar Paidbah” bala pynlong da ka Khasi Hills Autonomous District Council (KHADC)-kaba ban jur ia ka jinglong kongsan ban pynneh pynsah ia ka jingai pateng ki longshuwa manshuwa haba pdiang ia ka jingkiew shaphrang bad ka jingkylla ka por.
Ia kane ka jingialang la pynlong ha ka jingiadon ryngkat u Symbud Myntri Rangbah ka Jylla Bah Prestone Tynsong, u Chief Executive Member ka KHADC Bah Pyniaid Sing Syiem bad kiwei kiwei ki kynren ki lyndan.
U Lat ka Jylla ula ai ka jingiaroh ia ka Amendment ba dang shen jong ka Khasi Hills Autonomous District (Administration of Elaka) Act, 2023, bad ka Khasi Hills Autonomous District (Khasi Social Custom of Lineage) Amendment Act, 2023, kaba pynkupbor ia ki Dorbar Shnong, ki Rangbah Shnong, ki Seng Kynthei, Seng Samla bad ki Rangbah Kur.
Ula ban jur ba ka Sixth Schedulejong ka Riti Synshar ka Ri kala pynkup ia ka bor kaba kyrpang sha ki Autonomous District Council (ADC) bad ula kyntu ban don ka jingiatreilang hapdeng ki Nongialam jong ki ADC bad ka Sorkar Jylla ban lah pynthikna ia ka roi ka par kaba biang tarajur.
U Vijayashankar ula ong “ Nga sngew burom eh ban ieng hakhmat jong phi ha kane ka ‘Dorbar Iktiar Paidbah’ kaba pyni ia ka jingaiti lang jong ngi na ka bynta ka jingkiew bad bha ka miat jong ki shnong ki thaw jong ngi”.
U Vijayashankar u la ong ba kum u khlieh jong ka jylla u long uba donbok ban mynjur ia ka KHAD Administration of Elaka Amendment Bl 2023, bad ia ka KHAD Khasi Social Custom Lineage Amendment Bill 2023 kaba long ka sakhi ban pynkupbor ia baroh Dorbar Shnong ha ka jylla.
“Ka jinglong tynrai jong ka Meghalaya ka dei kaba la teh ha ka dustur aijait Kmie kaba long ka nongrim jong ki jaitbynriew Khasi, Jaiñtia Garo jong ngi. Ka rukom ai burom ia ki kmie bad ki kynthei jong ngi ban pynthikna ia ka jingbteng jong ki riti dustur ba riewspah jong ngi. Nga kyrpad ia uwei pa uwei u nongshong shnong ban sumar bad ban iada ia ka pateng bad ki riti dustur jong ngi ha ka imlang sahlang” ong u Vijayashankar.
U la bynrap ruh ba ki Autonomous District Council (ADC) ha Meghalaya ki dei ki nongsumar ïa ki riti dustur bad ki rukom synshar khadar nala tynrai. “Nga kyntu ia u nongialam jong ki ADCs jong ngi ban iatreilang bad ka sorkar jylla kaba long kaba donkam bha na ka bynta ka roi ka par baroh kawei jong ka jylla jong ngi” la ong u Lat.
U la kren ruh halor ka jingdonkam kyrkieh ban weng ïa ka jingma kaba nang kiew na ka jingdih drok, da kaba khot ïa ki seng bapher bapher, ki seng niam, bad ki nongïalam shnong ban ïatreilang bad ka Sorkar hapoh ka DREAM mission.
Haba pynpaw ia ka jingsngewkhia ia ka jingnang bun ki nongdih droks ha Jylla, u Lat ula ban jur ia ka jingdonkam ka jingiatreilang ban iakhun ia u droks khamtam halor ki sienjam ban iada ia ki samla jong ka Jylla.
U la pynbam smai ruh kaba la shim da baroh ki kynrem ki lyndan bad ki nongwan sha ka jingialang ban pynneh ia ka mynsiem kum ki nong Meghalaya bad ban iatreilang pyrshah ia ki jingsniew ha ka imlang sahlang kum ka jingktah jong u drok.
Kane ka jingialang kala kut da ka jingkhot ia baroh ki Nongshongshnong, ki Sengbhalang, ki Nongialam shnong ba kin iashimbynta shitrhem ha ka synshar khadar bad ka jingkiew shaphrang, ban pynthikna ia ka lawei jong ka Meghalaya kum ka sharak jong ka roi ka par kaba kynthup lang ia baroh.
 ha Meghalaya, kaba long u budlum jong ki paid Khasi, Jaintia bad Garo.){kind=link}