Thmu ka Sorkar ban shna ia ka surok 4-Lane na Umiam sha Shillong | Shen yn rai ia ka lynti iaid

Yn pynkylla ia ka surok Umtyrngar-Sohra sha ka Double Lane

Shillong, K’lyngkot 17 : Ka Sorkar Jylla kan sa shim rai shen ia ka lynti ban pyniaid (alignment) ia ka surok 4-Lane bala tyrwa ban pyntrei na Umiam sha Shillong.

Ia kane la pyntip da u Symbud Myntri Rangbah ka tnad PWD (Roads) Bah Prestone Tynsong ha ka sngi Thohdieng, hadien ba ula dep lum ia ka jingialang bishar kam ban pyntrei ia kane ka surok 4-Lane na Umiam sha Shillong.

“Ngi la iakren sani bha bad hadien ngi la rai ba u Chief Engineer ka National Highway (Roads) un sa shong jingialang biang bad ki consultant bala thung da ka NHIDCL ha ki khyndiat sngi ban wan. Kin sa iashong bad kin sa rai ia ka lynti ba pyniaid (alignment) kaba paka eh ban pyndep ia kane ka project bala tyrwa, kaba dei ruh kaba kongsan bha (haba khmih ia ka jingshngain jong ka Umiam, ka Pung bad ka Jingkieng)” ula bynrap.

Kat kum ka jingong jong u, ka Tnad Bording bad ka Meghalaya Energy Corporation Limited (MeECL) kila dep pynjari ia ki kyndon ba pyrrkhing ia ka jingkit khia jong ki kali kiba iaid lyngba ka Check Dam ha Umiam.

“Ngi la dep iakren ia kane bad shen ngin sa lah ban shim rai ia ka lynti ban pyniaid ia ka surok (alignment) bad hadien ba ngi la dep rai, ngin sa pynkhreh noh mar mar ia ka detailed project report (DPR)” pyntip u Bah Prestone.

U Symbud Myntri Rangbah ula ong “Ia kane yn sa shim rai da ki stad Technical ha ryngkat ki consultant bad hadien ba kila dep pynkhreh, ka Sorkar kan sa ai jingmynjur ia ka jingtyrwa. Ki consultant kin sa iashong bad ki stad technical ka PWD ha ki sngi ban wan”.

Haba kylli la ka Sorkar ka don jingthmu ban nang pynhreh ia ka surok 4-Lane na Jorabad sha Shillong da ka surok Six-Lane, u Bah Prestone ula ong “Hooid ka jingthmu ka don. Hooid na ka Ministry of Road Transport ruh hynrei ia mynta la ioh jingtip ba ka surok Six-Lane kan sdang shuwa na Jorabad sha ka thain Naogoan. Ka jingsorjamin jaka kala sdang. Ia kane ka project la khmih da ka Sorkar Assam”.

Halor ka surok Sohra-Shillong, u bah Prestone u pyntip ba ka Sorkar ka don ka jingthmu ban pynkylla ia kane ka surok sha ka Double Lane.

“Hooid kane ruh ngi la kynthup. Ngin sa pynkylla ia ka sha ka Double Lane. Ngi kwah ban pynkylla ia ka surok na Umtyrngar shaduh Sohra da ka surok Double Lane. Ia kane la pynrung hapoh ka project jong ka World Bank” ula pyntip.