Shillong, Kyllalyngkot 16: Ka lympung iakob ialehkai ka Meghalaya Games kaba 6, kala iai bteng da kaba pynlong ia ka jingiakob ialehkai Football ha Kiang Nangbah Stadium, Jowai hynne ka sngi Palei.
Ha ka jingiakhun kaba nyngkong ha ka liang ki kynthei, ka East Khasi Hills kala pynrem da 11-2 ia ka North Garo Hills.
Ha ka jingialehkai ka baar, ka West Garo Hills kala pynrem ia ka South Garo Hills da 4-0. Ka East Jaintia Hills kala jop da ka said ia ka East Garo Hills da 2-1.
Katba ha ka jingiakhun kaba khatduh, ka South West Khasi Hills kala pynrem ia ka West Khasi Hills da 1-0.
Ka Meghalaya Games 2025, kala sdang ha ka 16 tarik u Kyllalyngkot bad kan bteng haduh ka 25 tarik u Kyllalyngkot. Ia kane ka lympung ialehkai yn sa plie pyrda ha ka 20 tarik u Kyllalyngkot, ha kaba 3500 ngut ki nongialehkai kin iashimbynta ha ki 29 tylli ki jingiakob ialehkai.
