Shillong, K’lyngkot 15 : Ka Kynhun Myntri ka Sorkar Jylla ha ka sngi Balang kala ai jingmynjur ia ka Meghalaya School Service Rules, 2025.
Haba kren sha ki lad pathai khubor, u Myntri Rangbah Conrad K Sangma ula ong “Ia kane ngi la leh namar ha ki service rules bala leit, ka lad ban kyntiew kyrdan ka duna bha haba phai sha ki nonghikai LP bad ki Assistant teacher bad ki ju sahkut ha kajuh ka kyrdan bun bun snem, bad long pyrshah ia kaei kaba kiwei pat ki nonghikai ha ka Tnad Pule Puthi ki ioh. Kumta hadien ka jingiasyllok bad ki kynhun bapher bapher, ka Tnad kala pynkylla ia ka rules bad kane kan plie lynti ia ka lad kiew kyrdan jong ki nonghikai LP”.
Ha kajuh ka por, u Myntri Rangbah u pyntip ba ka kynhun Myntri kala ai jingmynjur ruh ia ka jingtyrwa ban thaw ia ka State Rules ka ban the kyndon ia ka jingsiew ba iadei bad ka bai phah leh test ia ki case bapher bapher hapoh ka Directorate of Forensic Science kaba hap ha ka Tnad kam pohiing.
