Shillong, K’lyngkot 15 : Ka Sorkar Jylla kala pynbna ia ka rai ban pyntreikam ia ka Town & Country Planning Scheme, kaba thmu ban wanrah ia baroh ki kynhun ba don bynta hapoh kawei ka tnum na ka bynta ka jingiatreilang kaba kham bha haba phai sha ka jingpyntreikam ia ka Town & Country side Planning hapoh ka Jylla.
Ia kane ka rai la ai jingmynjur da ka jingialang jong ka kynhun Myntri kaba long hynne ka sngi Balang.
Haba kren sha ki lad pathai khubor, u Myntri Rangbah Conrad K Sangma ula ong “Kaei kaba kane ka skhim kan leh ka long ban wanrah ia baroh ki kynhun ba don bynta ha kawei ka jaka kynthup ia ki Dorbar Shnong, ki Rangbah Shnong,ki Nokma, ki Raij, Elaka. Kan wanrah ruh ia ki Autonomous District Council (ADC), kan wanrah ia ki tnad bapher bapher kiba don bynta bad ki kynhun bapher bapher kiba iadonbynta hala ki jong ki jong ki jaka bad kane kan plie lynti ia ka iamir jingmut hapdeng kine ki kynhun ban iaplan bad iakren ia kum kiei ki kam pynroi ki dei ban wan”.
“Lada don wat tang uwei kynhun u bym mynjur ia ka plan, ka mut kane ka plan kan nym iaid shakhmat ne treikam” ula pynpaw.
Halor ki daw ha lyndet kane ka rai, u Conrad ula ong “Ha ka master plan jong ki jaka ha Shillong, ka don kumba 290 square km ka jaka hangne, kaba kynthup ia ka Mawkhanu bad ka thain Diengpasoh. Kaei kaba jia ha kine ki jaka, ka long ba ha kine ki shnong, ha ki katto katne ki kyrdan jong ki Tnad, ki District Council, ki Dorbar Shnong bad ki riew shimet kila pynroi ia ki jaka kat kum ka jingkwah jong ki bad kat kum ki plan lajong. Ka jingiamir jingmut kam don satia kumno ban iaplan ban pynroi ha ki jaka municipal bad shabar kijaka sor hynrei namar ka jingnang heh jong ki jaka sor mynta, ka long kaba donkam ban pynthikna ba ka dei ban don noh ka jingiatreilang hapdeng ki kynhun bapher bapher”.
“Ha ki snem bala leit ngim ju don ka jingiatreilang hapdeng ki kynhun bapher bapher, baroh baroh kila leh hi kat kaba ki mon bad kane kala pynkha ia ki khapsor ba ki jaka sor ba thymmai ba khlem ka plan kumba long mynta” ula ong.
Haba pynpaw ba kane ka scheme kan ai ka rynsan ban don ka jingiatreilang ha kaban iaplan bha noh ia ki jaka sor bad khapsor, u Conrad ula ong “Kane ka skhim kan nym mushlia satia ia kanp kano ka hok jong kano kano ka tnad lane ki Rangbah Shnong lane ki District Council. Kan long tang kum ka rynsan ban ailad ia ki kynhun bapher bapher ba kin iawanlang shijaka”.
U Myntri Rangbah u pyntip ba khnang ban lah pyntreikam ia kane ka scheme, yn hap ban pynkylla ia ka Building Byelaws.
