Guwahati, Nailar 26 : Ka thma ktien hapdeng u Myntri Rangbah (CM) ka Assam bad Delhi, u Himanta Biswa Sarma bad Arvind Kejriwal sa shisien pat kala khie biang da ki jingiakynthoh markylliang lyngba ka Twitter.
Ha kane ka kynti kaba mynta, ka mat kaba kine ki nongialam kila ia pynpaw kalong ha kaba iadei bad ki skul pule.
Hynnin ka sngi Palei, u CM ka Delhi, u Arvind Kejriwal ula kynthoh ia ka sorkar synrop ba la lamkhmat da ka BJP hapoh Assam halor ka rai ka jong ka ban pyniasoh noh ia ki skul kiba ka jingpass ka long 0 percent ha ki eksam klas 10 mynta ka snem bad kiwei pat ki skul.
“Ka jingkhang khyrdep ia ki skul kam dei ka lynti kaba lah ban weng ia ki jingeh.Ngi donkam ban plie bun shuh shuh ki skul hapoh ka ri.Ha ka jaka ban khang khyrdep ia ki skul, pynbha ia ki bad kyntiew ha ka liang ka pule puthi,” ong u CM ka Delhi, u Arvind Kejriwal lyngba ka twitter.
Nalor kata u CM ka Delhi ula aijingmut ruh ia ka sorkar Assam ba kan shim ia ki nuksa na ka Delhi ha kaba iadei bad ki polisi treikam na ka bynta ki skul khnang ban lah ban kyntiew ia ka pule puthi ha ka jylla.
Haba pynphai kylliang ia kane ka jingpynpaw da u CM ka Delhi, u CM ka Assam, u Himanta Biswa Sarma ula ther tyngeh ia u Kejriwal halor ka jingkynthoh ia kaei kaei kaba um shym la tip.
U CM ka Assam u la thoh, “ ArvindKejriwal Ji- Kumba ju long phi kynthoh ia kaei kaba phim shym la tip! Naduh ki sngi ba Nga dang bat kum u Myntri ka tnat pule puthi, haduh mynta, sngewbha ban tip, ka sorkar Assam kala pynmih haduh kumba 8610 tylli ki skul thymmai.Katno tylli ki skul ka sorkar Delhi kala sdang ha kine ki hynniew tylli ki snem kiba la leit noh?”
Ha kawei pat ka bynta, hynne ka step sngi Thohdieng, u CM ka Delhi, u Arvind Kejriwal ula kynthoh biang ia u Himanta Sarma da kaba ong ia u ba ki dei ban wan jurip markylliang ia ki jylla jong ki bad ban bishar bniah halor ki rukom pyniaid skul hapdeng kine ki ar jylla.
“Nga long uba kloi ban leit jurip sha Assam.Iathuh ia nga, lano Ngan wan?.. Phi ruh wan jurip sha Delhi bad peit ia ka rukom treikam jong ki skul ha kane ka jylla,” ong u Kejriwal.
