Mih ki paidbah ban khanglad ia ka Public Hearing
Shillong, K’lyngkot 09 : Ki paid nongshongshnong ka Par Umkhen ha ryngkat ka shnong Nonghali bad ki shnong ba marjan, kila iamih paidbah ha ka step sngi Palei, ban khanglad ia ki bor Sorkar ba kin pynlong ia ka public hearing ha Nonghali na ka bynta ban wanrah ia ka Waste Management Plant (jaka theh niut) ha Lum Sohlait.
Kine ki shnong ki dei kiba hap ha khappud ka East Khasi Hills, West Jaintia Hills bad ka Ri-Bhoi District bad la lamkhmat ia kane ka jingiakhih da ka Synjuk ki Nongsynshar Shnong ka Par Umkhen ha ryngkat ka Nonghali.
Naduh dang step, ki paidbah kila iamih ban khang lynti ia ka surok da ki maw bad ki dieng hapoh ka shnong Jaroid, hashuwa ban poi sha ka jaka ban pynlong ia ka public hearing ha Nonghali.
Kane ka Public hearing ka dei kaba la buh ban pynlong da ka Meghalaya State Pollution Control Board (MSPCB) na ka bynta ban tei ia ka Waste Management Plant ha Lum Sohlait kaba hap hapoh ka shnong Nonghali.
Ki paidbah kila ialum khrui ha surok bad khang lynti syndon ia ki bor ka MSPCB, ki Magistrate bad ki Pulit ba kin hiar sha ka shnong Nonghali.
Ha ryngkat ki placard, ki paidbah kila pynpaw ia ka jingpyrshah kaba jur ban wanrah ia kane ka jaka theh niut haba kyn thoh ba kane ka project kan sa ktah jur ia ka mariang bad ia ka koit ka khiah jong ki nongshongshnong ba marjan.
Kila pynpaw ba naduh nyngkong, kila dep phah shithi sha ki bor Sorkar ba pynpaw ia ka jingpyrshah ia kane ka project hynrei haduh mynta ki bor Sorkar kim shym la jubab satia ia ka shithi bad thmu ban pynlong da ka bor ia kane ka public hearing.
