Shillong, Kyllalyngkot 06: Ka Rangdajied United kaba bat ia ka nam lahduh jong ka Meghalaya State League ha u snem bala lah bad ka Shillong Lajong kaba la rah ia ka nam lahduh ha u snem 2019, kin iakhun pyrshah ha ka Quarter final jong ka MSL 2024 kaban long ha ka 9 tarik u Kyllalyngkot ha Wahiajer Sports Complex.
Kane ka jingiakhun hapdeng kine ki ar tylli ki kynhun ialehkai football kiba pawnam ka jylla kan sdang ha ka por 1 baje mynsngi.
Ia kane ka lympung ialehkai la pyniaid da ka Meghalaya Football Association ha ryngkat ka jingioh jingkyrshan na ka sorkar jylla bad la pynsangeh noh shwa ia kane ka jingialehkai ha u Naiwieng 2024 kadei na ka bynta ban ailad ia ki nongialehkai ka jylla kiba leit ban iashimbynta ha ka National Football Championship jongka Santosh Trophy, ha kaba ka jylla Meghalaya kala rem noh ha ka Quarterfinal.
U Tournament Director ka MSL 2024, u Dr LL Mawsor, ula pyntip ba kila don 8 tylli ki kynhun kiba la ioh rung sha ka Quarterfinal.
Hadien jong ka jingialehkai kaba nyngkong ia ka Quarterfinal, ha ka 11 tarik mynta u bnai ka Sutnga (East Jaintia Hills) kan iakhun pyrshah ia ka Ladthadlaboh (West Jaintia Hills) ha Diengshynrum, Khliehriat. Ha Shillong, ha SSA Stadium, ka Mawlai kan iakhun pyrshah ia ka Khliehmawlieh.
Hadien kane yn sakhi ruh ia ka jingiakhun hapdeng jong ka Chipakkore pyrshah ia ka Rymbai Shkenshynriah ha PA Sangma Stadium, Tura ha ka 14 tarik u Kyllalyngkot.
Ka Lajong kala pynrem ia ka Rangdajied ha ka final kaba la long ha u snem 2019 ban rah ia ka nam lahduh ha Khliehriat bad ka Rangdajied kala ioh ia ka kabu ha kaban pynliem noh ia ka SLFC ha ka semifinal jong u snem 2023 hashwa ba kan rah syndon ia ka nam lahduh.
