Guwahati, Nailar 25: Satang hynriew bnai shwa ban leit sha ka ilekshon, kumta ruh na ka liang ka seng BJP kala iaid shakhmat ha kaba iadei bad ki jingpynkhreh na ka bynta kane ka ilekshon assembly ha Tripura, ha kaba na ka liang u Myntri Rangbah (CM) Manik Saha bad u Symbud jong u kila pynlong ia ka jingialang ba kongsan ha Guwahati hynnin ka sngi balang ha ryngkat u Myntri Rangbah ka Assam bad ki nongialam na central.
Na ka liang u CM bad u Symbud (Dy. CM) ka Tripura, u Jishnu Dev Varma kila pynlong ka jingialang bad u CM Himanta Biswa Sarma, u National Genl Secretary ka party, u B.L. Santosh ha kaba kila iamir jingmut halor ki sienjam kiba iadei bad ka jingpynkhreh ia kane ka ilekshon ka ban sa long ha u bnai Rymphang 2023.
Ha kane ka jingialang kaba la neh haduh sawkynta, la iamir jingmut ruh halor ka mat, ba la kin dang bteng ne em ia ka jingiateh lok bad ka party Indigenous People’s Front of Tripura (IPFT) kaba ia don lang hapoh ka sorkar ba mynta.
Na ka liang u National Vice-President ka BJP, u Baijayant Jay Panda bad ki nongkhmih bniah ka central halor ka Tripura ruh kila ia don bynta lang ha kane ka jingialang kaba la long ha ka nongbah Guwahati hynnin ka sngi.
U Sarma uba dei u riew shemphang ka BJP halor ki kam sain hima bad ruh u convener jong ka ki kynhun ba la lamkhmat da ka BJP pyrshah ia ki party riewlum ba la lamkhmat da ka Congress, ka North East Democratic Alliance (NEDA), ula shim ia ka bynta kaba kongsan ha ka ilekshon assembly ha u 2018 ha Tripura, kata hadien ba ki kynhun synrop hapoh ka jingialam ka saffron party (BJP) kila lah ban pynrem ia ki kynhun Left Front ba la lamkhmat da ka CPI-M hadien 25 snem kynthih.
U national president ka BJP, u JP Nadda bad u heh nongialam ka Rashtriya Swayamsevak Sangh u Mohan Bhagwat la khmih lynti ba kin pynlong la ka jong ka jingwan jngoh sha ka jylla na ka bynta ki jngialang jong ki kynhun seng ha kane ka taiew ka ban wan.
Ha kawei pat ka bynta, ka Trinamool Congress (TMC) hynnin ka sngi Balang kala weng noh ia u Subal Bhowmik na ka kam president jong ka party ha Tripura.Katkum ki tyllong khubor ka party, la ong ba u Bhowmik uba la don kham hashwa hapoh ka seng BJP, sa shisien pat u lah ban leit pyniasoh biang bad katei ka party, kata hadien ka jingwan jngoh u president ka BJP u JP Nadda ha kane ka taiew ka ban wan.
U Bhowmik uba dei u MLA barim ka Congress ula shah jied kum u president ka TMC ka Tripura hadien ba ka nongialam ba hakhliehduh ka party kaba dei ruh ka Myntri Rangbah ka West Bengal ka Mamata Banerjee ha ka 29 tarik u Iaiong ba la lah ka la pynbna ia ki 132 ngut ki dkhot ba pura jong ka state committee hapoh Tripura kaba synshar da ka BJP.
U Bhowmik hashwa ba un pyniasoh sha ka seng Congress ha ka snem 2020 ha ka sien kaba ar, ula don bad ka seng BJP na ka bynta khyndait snem.
Ha kawei pat ka bynta, ha ka jingjia kaba la ktah jur ia ka party synshar BJP ha Tripura, u nongialam ba halor jong ki trai shnong riewlum, u Hangsha Kumar Tripura ha ka sngi ba Ar ba la lah ula leit ban pyniasoh bad ka Tipraha Indigenous Progressive Regional Alliance (TIPRA), ka kynhun liang pyrshah ba kongsan jong ki trai shnong.
Ha ryngkat bad kumba 6,500 ngut ki trai shnong kiba dei na ka BJP bad ka party IPFT, u Hangsha Kumar ula pyniasoh ia lade bad ka TIPRA ha ka jingialang paidbah kaba la long ha Manikpur ha ka thain shatei ka Tripura.
