Nongpoh, Nailar 24 : Ka Synjuk ki Rangbah Shnong ka Raid Nongtung, Block-II kila pynpaw ia ka jingangnud bad ka jingkyrmen ba u Myntri Rangbah ka Jylla Conrad Kongkal Sangma, un pynioh ia ka jingbishar kaba hok ia ki nongshongshnong ka thain ha ka wat iakren pynbeit pud ba-ar, ka ban sa sdang shen.
Kane ka sur jong ka Synjuk ki Rangbah Shnong na Block-II kala mih na ka jingialang bala lum kyrkieh da ka Synjuk hynne ka sngi balang ha Mawlasnai, ban iakren pynbeit lypa iaka kamram ban leh daki Nongialam Shnong ha ka por wan jurip pud na baroh arliang ki sorkar-ka Assam bad Meghalaya.
Dang ha ka Sngi U Blei, ki arngut ki Myntri Rangbah ka Jylla Assam bad Meghalaya kila sdang ia ka jingiakren pynbeit pud jong ka wat ba-ar ha Guwahati bad rai ban thaw noh ia ki Regional Committee hapoh ka 15 sngi ban pyntyllun shakhmat ia ka jingiakren.
Haba pyntip ia kane ka jingialang, u Bah Blikson Sohtun, President ka Synjuk ki Rangbah Shnong ka Raid Nong tung ula ong “Ka jingiakynduh jong ngi ka long ban pynkhreh ia ki jingiakren hakhmat ki Regional Committee ki ban sa wan jurip ia u pud u sam bad wad bniah ia ka hok longtrai halor ka khyndew ka shyiap jong ngi ha Block-II”.
“Ka dei ka jingangnud bad jingphohsniew jong ngi ba da ki phew phew snem baka Block-II kan ioh noh ia ka jingsuk bad kan hap biang noh sha Meghalaya. Ngi thrang ban lah pynbeit noh mardor ia ka jingiakajia” ula ong.
“Ngi pynpaw ka jingsngewnguh ia ka Sorkar Meghalaya bad Sorkar Assam kiba la shimkhia ban iapynbeit noh ia ki jingiakajia pud hapdeng ki artylli ki Jylla bad kynthup lang ia ka Block-II” ula bynrap.
U Bah Blikshon ula ong “Kum ki Nongialam Shnong ka Block-II, ngi kwah ban urlong noh ka jingangnud ban iapynbeit thikna noh ia u pud u sam. Ngi kyntu ruh ia ka Sorkar Meghalaya ba kan peit ruh ia ki Shnong ki Thaw baroh kiba dei jong ki Khasi ba kin shah pynhap biang sha Jylla Meghalaya da kaba pynshong nongrim kat kum ki riti ki dustur bad ki jingshisha baroh kumba la buh da u menbarim”.
“Ngi kyrpad ruh ia ki Sengbhalang ka Jylla ba kin sngewbha iarap lem ia ngi ki paidbah ka thain ha baroh ki liang khnang ba ki paradoh parasnam kiba don ha Block-II kin ioh noh iala ka hok” ula ong.
