Shillong, Nohprah 05 : Ka shnong Mynsain, Upper Lumparing, kan sa iohi ia ka jingmih jong ka Sports Stadium kaba biang nadong hadong hapoh ka Shnong, ka ban sa tei ia ka jaka kaba heh kumba 3 acre.
U MLA ka Shillong South Bah Sanbor Shullai ha ka sngi Palei ha ryngkat ki Nongialam Shnong, ki Sports Club bad ki Heh Ophisar na ka Tnad Forest, kila leit jurip ia kane ka jaka ban peit ia ki jingdonkam ba hap ban leh bad buddien.
Kane ka Sports Club kan dei kaba kham paka ban ia ka JN Sports Complex ha Polo la ka dei ha ka jingheh ne ka jingbiang ki jingdonkam baroh.
U Bah Sanbor ula pyntip paidbah ia ki jingthmu jong u halor kane ka Stadium ka ban sa don ia shibun ki jaka ialehkai ba kynthup naduh ka jaka iajngi (swimming), athletics, basketball, volleyball bad kiwei kiwei.
Ban ioh ia kane ka jaka, kala don ka jingpyrkhat ban shu bujli jaka hapdeng ka Raiad bad ka Tnad Forest ha kaba ka Raid kan sa ai bujli ia ka jaka ba 15 acre khnang ban lah pynneh ia ka khlaw ka btap ba don ha ka thain.
Hadien bala pyndep ia ka jingia aiti ia ki jaka, yn sa pynkhreh ia ka Detailed Project Report (DPR) ban pynioh ia ka pisa ha kaban sdang trei noh ia kane ka jingtei, pyntip u Bah Sanbor.
