Shillong, Nohprah 05 : Ka Sorkar India bad ka Asian Development Bank (ADB) hynne ka sngi Palei, kila iasoi soskular ban shim ram ba kot T.50 million, ban shna ia ki jaka pyllang um (water-harvesting system) ha Meghalaya, ki ban pynthikna ia ka jingioh umbam umdih bad tem ia ki jingeh jong ki Shnong ki Thaw namar ka jingktah jong ka jingkylla ka suinbneng (climate change).
Kiba iasoi ia kane ka soskular shim ram na ka bynta ka Climate-Adaptative Community-Based Water-Harvesting Project in Meghalaya ki dei ka Juhi Mukherjee, Joint Secretary, Department of Economic Affairs, Ministry of Finance, ka Sorkar India bad ka Mio Oka, Country Director ka ADB’s India Resident Mission jong ka ADB.
Hadien ba dep soi ia ka soskular shim ram, ka Mukherjee kala ong ba kane ka project ka iahap bad ka Meghalaya State Water Policy (MSWP) 2019, kaba thmu ban ioh ia ka roi ka par kaba neh, ka jingpyniaid bad ka jingpyndonkam ha ka rukom kaba dei ia ki um jong ka jylla lyngba ka jingiashim bynta lang, ban pynduna ia ka jingma, bad ban pynshlur ia ka rukom tyngkai ia ka um.
“Nalor ka jingbei tyngka, ka ADB kan don bynta ruh ha kaban iarap ia ka Jylla ha ka jingpyntreikam ia ka MSWP bad ban btin lynti ha ka shim ia ki sienjam ha ka ban plan ia ki lad ki lynti kat kum ka jinglong ka suinbneng ban tehlakam ia ka jingkyrduh um. Kane ka kynthup ia ka jingpynwandur ia ka Water Harvesting System (WHS) ban kyrshan ia ka rep ka riang, ri dohkha, thungsoh thung pie bad syntiew, ka jingsam umbam bad kiwei kiwei ki lad kamai na ka bynta ka jingroi ka ioh ka kot” ong ka Oka.
Ka project kan kyrshan ia ka jingtei ia ki 532 tylli ki jaka pyllang um ha baroh ki 12 tylli ki District ka Jylla bad yn pynwandur ia ki ha ka rukom ba kin lah ban kyrda ia ka jinglong ka suinbneng bad ban lah lum ia ka um haba jur u slap bad wan umsaw ha ka por lyiur. Ka um kaba pyllang kan iarap pat ban pynioh umbam umdih ha ka por ba rkhiang ka suinbneng.
Kane ka projek kan pynroi ia ka jaka command area kaba heh 3000 hectare ban pynbiang um sha ki jaka rep na ka bynta ki nongrep. Kan thaw 50 tylli ki Weather Station na ka bynta ban lum bad peitngor ia ki jingtip jong ka jinglong ka suinbneng, bad ki rukom pynpoi um sha ki jaka rep ha ki thain Garo, Jaintia, bad Khasi.
Ka ADB kan iarap ban pynkhlaiñ ia ka bor jong ka Meghalaya State Watershed and Wasteland Development Agency bad ka tnad Soil and Water Conservation ha ka jingpyllang ia ka um, ka jingtreikam, bad ka jingpyniaid kam. Nalor kata, kane ka projek kan ai jinghikai ïa ki nongrep khamtam ïa ki kynthei ban kyntiew ïa ka jingmih na ki jaka rep ba pynpoi um rep kum kiba rep soh, syntiew bad ri dohkha.
 hynne ka sngi Palei, kila iasoi soskular ban shim ram ba kot T.50 million, ban shna ia ki jaka pyllang um (water-harvesting system) ha Meghalaya, ki ban pynthikna ia ka jingioh umbam umdih bad tem ia ki jingeh jong ki Shnong ki Thaw namar ka jingktah jong ka jingkylla ka suinbneng (climate change).){kind=link}