Shillong Nohprah 03: U Myntri Rangbah ka jylla u Conrad K Sangma hynne ka sngi Baar ula shah shkor ia ka jingpynsngew ki nongialam shnong halor ki jingeh bad ki mat bapher lyngba ka prokram CM – Connect kaba la long ha Nongstoin, West Khasi Hills.
Ha kane ka prokram la wan ban iashimbynta da ki khlieh nongsynshar shnong na ki shnong bapher bapher kiba hap hapoh jong ka Nongstoin Block ha ryngkat ka jingdonlang ki heh ophisar sorkar na ki tnad bapher bapher.
Ki nongialam shnong kila ioh ia ka lad ban iakren bad u Myntri Rangbah ban pynpaw ia ki mat bad ki jingdonkam ka shnong ka jongki bad kila kyrpad ia u Myntri Rangbah ba yn tuklar lem ia ki mat kiba la pynsngew kiba ki kynthup ia ka jingbhah tyngka ban shna ia ki surok, jingkieng, Health Center, ki kam pynroi na ka bynta ka kam jngohkai, ki kam pynroi ha ka liang ka kam ialehkai, ka jingdonkam ia ki Bank bad ban kyntiew ia ki prokram bad ki skhim, ban kyntiew ia ki skul bad ki jaka ai jingsumar ia ki mrad bad kiwei kiwei.
U Myntri Rangbah ula shah shkor bha ia ki jingpynsngew jong ki nongialam shnong bad ula bthah ruh ia ki khlieh jong ki tnad sorkar ban shimkhia mardor halor kitei ki mat.
Ha kaba iadei bad ka jingsngewkhia halor ka koit ka khiah, u Myntrio Rangbah ula ong ba ka sorkar ka dang ialeh ban kyntiew iaki jaka ai jingsumar kiba la don lypa khnang ba kin lah ban ai jingshakri kham bha shuh shuh.
Ula ong ruh ba ka sorkar kan pynbiang ia ki Grant na ka bynta ki seng trei mon sngewbha ban kyntiew shuh shuh ia ki jingtei bad jingdonkam kiba la don lypa ha ki jaka ai jingsumar.
U Myntri Rangbah ula pynbna ba ka sorkar kan ialeh noh mardor, ban kyntiew noh ia ka Nongstoin Civil Hospital.
Ha kaba iadei bad ka kam ialehkai, u Myntri Rangbah ula pyntip ba ka sorkar kala bei tyngka palat ia ka T.1000 Klur na ka bynta ban kyntiew ia ka jingtei ha ki kam ialehkai ha kylleng ka jylla Meghalaya bad ula pynthikna ba ka sorkar kan trei ryngkat lang bad ki shnong ki thaw ban tei ia ki jaka ialehkai ha ki thaiñ nongkyndong.
Ha kaba iadei bad ka jingkyrpad ban pynduna ia ka ram naka bynta ki SHG, u Myntri Rangbah ula ai ka jingkular ba un shimkhia ia katei ka kam bad ka Myntri ka Sorkar pdeng kaba khmih ia ka pla tyngka.
Haba kren ha ka jingialang, u Myntri Rangbah ula ong ba ka CM Connect kadei ka kabu ia ka sorkar ban sngap bad shah shkor bad ban pynbeit ia ki jingeh jong ki paidbah bad ula pynshlur ia ki MLA, ki khlieh jong ki tnad Sorkar ban pyniasoh bad ki paidbah ha ka kyrdan ka jongki.
Ka CM Connect kaba la pynlong ha Nongstoin kadei ka 5 kaba la pynlong ha ka jylla bad u Myntri Rangbah ula ong ba un bteng ban ialeh ban pyniajan ia ka jingai jingshakri ka sorkar sha ki paidbah ka jylla.
