Shillong, Risaw 13: Ki karkhana rit ha ka Jylla Meghalaya kin kham suk noh khyndiat na ka jingkyllain ki kam ki jam, ha kaba ka Kynhun Myntri hynne ka sngi Baar kala mynjur ia ka Ordinance ban plie lad ha kaban ioh treikam sted noh.
Ka Meghalaya Micro, Small and Medium Enterprises Facilitation and Establishment of Operations Ordinance kan plie lad ia ki nongsengkam lajong ban aplai ban ioh ia ki jingmynjur kiba bun, la ong u Myntri Rangbah u Conrad K Sangma.
“Ka Ordinance kan pyllait ia ki MSME na kino kino ki jingdonkam hynreI kan pynsuk shuh shuh ia ki” ong u Sangma.
Ula ong, ba ka sorkar kala shim ia ki sienjam ban pynbha bad pynsuk ia ka rukom leh ia ki kam khaii pateng bad ka Jylla kala wan ha ka kyrdan kaba heh ha kaban weng ia ki kyndon pyrkhing ki bym don jingmut.
“Kane ka Ordinance kadei kaba iaid ryngkat ha kaban pynsuk ha ka kam khaii pateng ryngkat bad ka bud ia ki kyndon kiba la buh da ka Sorkar India ia baroh ki Jylla” ula ong.
U Sangma ula ong, ba kane ka jingplie lad kan dei thik tang na ka bynta ‘White Category Industries’ ne ki karkhana ki bym pynjaboh eiei, ki bym donkam ia ka Pollution Related CTE bad CTO, kaba kynthup ia ka jingioh jingbit na ka MUDA, Municipal bad Registration.
