Shillong, Naiwieng 23 : U Myntri kam jngohkai Bah Paul Lyngdoh ha ka sngi Saitjain ula ong ba u Symbud Myntri Rangbah ba khmih ia ka Tnad Urban Affairs Bah Sniawbhalang Dhar, un sa khot shen ia ka jingialang ban iakren halor ka kam ba iadei bad ka jingtyrwa ban pynkynriah ia ki dukan madan na ka thain Khyndailad.
Haba iaken bad ki nongthoh khubor, u Bah Paul ula ong “U DyCM un s alum ia ka jingialang lehse ha ka taiew ban wan bad ngin sa lah ban iashong ban iabishar kam ba kumno ki kam kila iaid naduh ka jingialang kaba dang shu dep”.
Haba kylli, u Myntri ula ong ba um don jingtip satia ia kano kano ka jingpynjlan ia ka tarik, kaba la rai ban pynkynriah ia ki diukan madan.
“Ngam don jingtip ia ka jingpynjlan tarik naamr ka sngi ba khatduh (24 Naiwieng) la pyntip sha ngi ha ka jingialang da u Commissioner & Secretary ka Tnad Urban” ula ong.
Ha ka sngi Thohdieng, ki nongshongdukan madan kila leit tur sha Shillong Municipal Board (SMB) ban pyrshah ia ka jingthmu ban pynkynriah ia ki na Motphran bad Khyndailad.
Halor ka jingpan jingshai halor ki 200 ngut ki nongshong dukan madan kiban ioh jingiarap na ka Sorkar, u Bah Paul ula ong “Ka kam ban ithuh ia kiban ioh jingmyntoi ka dei kaba la leh da ka Shillong Municipal Board. Ka dei ka kam kaba shai bha bad u CEO lem bad kiwei ki Ophisar kynthup u Executive Engineer, kila don bynta lang ha baroh ki jingiakren bad jingiapynbeit hynrei kumba nga ong, phi lah ban ioh ia ki jingtip ba bniah na u DyCM ka Tnad Urban Affairs bad ruh na u CEO ka SMB”.
“Ngam don jingtip iano phi kren hynrei ha ka jingialang ka Sorkar, baroh u CEO bad u Executive Engineer kila iadonlang ha ka jingialang, kaba la long khatduh eh mynta la artaieew ha kamra treikam u DyCM” ula ong.
U Bah Paul ula ong “Phi lah ban kynmaw ba ki jingialang kila long la bunsien ha ka jingpyniaid u DyCM bad la iathaw ruh ia ka Committee ha u snem balalah, kaba kynthup ia ki nongmihkhmat na ka seng ki nongshong dukan madan”.
“Kam long satia kaba phylla ban ong ba ym shym la iasyllok ia ki namar kine ki jingialang kila don jingthoh lut bad kala shimpor palat ia ka shisnem ban pyndep ia ki kam baroh. Kumta, kam don nongrim sati ban ong bay m shym la syllok satia ia ki.
Hynrei, ula ai jingmut ba kan bha ban iakren ia u DyCM ka Tnad Urban Affairs namar kane ka kam ka dei kaba khmih da ka Tnad Urban bad ka Tnad Tourism ka don bynta tang ha kaban pynkylla dur ia ka Khyndailad.
