Shillong, Naiwieng 19 : Ka Meghalaya SSA Schools’ Association (MSSASA) kala ban jur ia ka jingdonkam ba ka Sorkar Jylla kan ai ia ka bhah ba 70% ia ki Nonghikai SSA ha ka jingthungkam nonghikai ban pyndap ia kam ba lait thylli ha kylleng ki skul hapoh ka Jylla.
Kane ka dei kawei na ki phra tylli ki jingai jingmut bala aiti da ka Association ha ka jingialang bala pynlong da u Commissioner & Secretary ka Tnad Education Vijay Mantri ha ka sngi Nyngkong, kaba iakren halor ki jingeh jong ki nonghikai SSA ha Meghalaya.
Ha kane ka jingialang la wan ban iashimbynta da ki dkhot ka All Meghalaya SSA School Teachers Association (AMSSASTA) bad ka Meghalaya Fourth Teachers’ Association.
La pynsngew ruh ba hadien ka jingaipor ba arbnai da ka MSSASA ia ka Sorkar Jylla ba kan wanrah ia ka Policy ka ban thungkam pura noh ia palat 13000 ngut ki nonghikai SSA ha ka Jylla.
“Ngi la aiti ia phra tylli ki jingai jingmut sha ka Sorkar Jylla ba kan pynrung ha ka policy ka ban ai jingshngain ia ka jingshakri jong ki nonghikai SSA. Kine ki kynthup ia ka jingdonkam ia ka Sorkar Jylla ban pynkylla ia ka Meghalaya School Education Service Rules. Ha ka 23 tarik Risaw, ka Sorkar Jylla kala mynjur ban pynjynsur ia ka rta thungkam ia ki nonghikai SSA n aka 37 sha ka 45 snem ban ailad ia ki ba kin thep ia ki kam ba lait ha ki skul Primary bad Secondary jong ka Sorkar. Nalor kane, ngi la kyrpad ruh ia ka Sorkar ban ai ia ka bhah haba iadei bad ka jingthungkam ha ki kam nonghikai ba lait. Ngi tyrwa ban ai 70% ka bhah ia ki Nonghikai SSA bad 30% lyngba ka jingthung kam beit beit” ong u President ka MSSASA Aristotle Rymbai haba iakren bad ki nongthoh khubor hadien ka jingialang.
Ula pyntip ba ka Association kala ai jingmut ruh ia ka jingdonkam ban pyllait noh ia ki nonghikai SSA, kiba la rung kam ha lane shuwa ka 23 tarik Nailar 2010 lane 29 tarik Naitung 2011 ba kin iakhun ia ka eksam Meghalaya Teachers’ Eligibility Test (MTET). Kane ka dei namar ka shithi jong ka Tnad Pule Puthi ha ka por ba sdang pyntreikam ia ka SSA Programme, kala pynpaw ba kito kiba pass ia ka 10+2 ki dei kiba la biang ban long ki nonghikai SSA.
“Nalor kane, ngi la tyrwa ruh b aka Sorkar ka dei ban mynjur ha kaban long da ka Special Teachers Eligibility Test (Spl TET) ia ki nonghikai SSA, kiba la rung kam hadien u snem 2011. Ka Sorkar kam lah ban iakhleh lang ia ki bad ki kyrtong iakhun kam ba thymmai namar kam iahap haba shim ba ki nonghikai kila ai ia ka jingshakri jong ki la palat 20 haduh 25 snem. Lada kiwei ki Jylla ki lah ban pynlong ia ka SplTET ia ki nonghikai SSA, balei ba ym lah ha Jylla Meghalaya” ula ong.
