Shillong, Nailar 23: U MLA ba shah sospon jongka Congress na ka Shillong West Constituency Bah Mohendro Rapsang ula iengskhem ha ka rai ban pyrshah jur ia ka jingthmu jong ka Sorkar ha ka ban pynkynriah ia ki 342 tylli ki Longiing jong ki Harijan na Them Metor shajan TB Hospital, Mawbah.
Une u MLA ula kyntait ruh ia ka jingkynnoh jong u MDC ka Jaiaw Bah Paul Lyngdoh ba ka jingthmu ban rah ia ki longiing ki Harijan sha Mawbah ka dei ka jingai jingmut u Bah Rapsang tang ban pynbun iala ka vote bank ha ka constituency.
“U Bah Paul u dei ban sngewthuh kawei, ngam dei u Myntri Sorkar, nga kyrshan ia ka Sorkar na shabar…ta ka daw ka rai ban pynkynriah ia ki Harijan ka dei ka rai ka Sorkar. Ngam don bynta eiei ruh em ha kane ka rai” ong u Bah Rapsang.
U Bah Rapsang ula pyntip ruh ba u ieng ryngkat bad ka Dorbar Shnong ban pyrshah ia ka rai jong ka Sorkar ban pynkynriah ia ki Harijan na Them Metor sha Mawbah, kaba hap hapoh ka West Shillong Constituency.
Ula ong ruh ba kane ka kam kan dei kaba un shimkhia hakhmat eh lada u shah jied biang kum u MLA na West Shillong ha ka elekshon MLA ban wan.
