Shillong, Naiwieng 15: U Myntri ka Sorkar Pdeng ba khmih ia ka tnad Civil Aviation Rammohan Naidu Kinjarapu, hynne ka sngi Thohdieng ula leit iashimbynta ha ka jingrakhe ia ka Janjatiya Gaurav Diwas kaba la pynlong da ka State Rural Employment Society bad ka tnad C&RD, ha State Convention Center ha Shillong.
Ha kane ka jingrakhe la iashimbynta lang da u Myntri Rangbah ka jylla Meghalaya u Conrad Sangma, ki nongialam riewlum kiba pawnam, ki riewpawkhmat na ka jaitbynriew Khasi, Jaintia bad Garo.
Haba kren haka jingialang u Myntri ka Sorkar Pdeng ula pynpaw ia ka jingsngewnguh ban ioh ban rakhe ia ka bynta kaba saw jong ka Janjatiya Gaurav Diwas ha Meghalaya bad ula pynpaw ka jingsngewnguh ia ka jingshlur jong ki riewlum kiba la len lade ban shna ia ka lynti jong ka ri sha ka jinglaitluid bad kiba la trei borbah ban pynneh ia ka mariang bad ia ka deiriti.
“Kane ka dei ka sngi ai burom ia ka kam ba khraw jong u Birsa Munda, u riewlum uba la iakhun na ka bynta ka jinglaitluid ka ri bad ki jinglen lade ka jongu ka iai bteng ban ai mynsiem ha ka jingiakhun na ka bynta ka hok, ka jingiaryngkat kyrdan bad ka jingiada ia ka jinglong bad ka deiriti riewlum,” la ong Myntri ka Sorkar Pdeng.
“Ha Shillong, hapdeng ki Khasi, Garo, bad Jaintia, nga kmen ban iohi ia ka jingpynneh bad ka jingkyntiew ia ka deiriti riewlum. Dang shen nga la wan sha Khasi Heritage Village bad nga la itynnad bha ia ka jingieng skhem ban pynneh ia ki ‘law kyntang bad ka mariang, ka jinglong kaba la hiar pateng la pateng. Ka jingiada ia ka mariang ka dei ka jingngeit kaba kongsan ba ki riewlum ki la ai pateng bad ka don ka jinghikai kaba kongsan ia baroh ki briew” ula ong.
Nalor kane ula kdew ruh ia ka jingiaid shaphrang hapoh ka jingialam u Myntri Rangbahduh ka ri u Narendra Modi bad u Myntri Rangbah ka jylla u Conrad Sangma, khamtam ha ka jingpynbiang ia ki jingdon jingem, ka pule puthi bad ki lad ioh jingsumar ia ki riewlum.
Ula kren ruh shaphang ka jingbun ki skul Eklavya Model Residential, kiba pynbiang ka jingpule kaba bha ia ki khynnah riewlum kaba la kiew na 123 tylli ha u 2014 sha 476 tylli ha kylleng ka ri kiba ai jingmyntoi ia ki phew hajar ngut ki khynnah riewlum kiba dang don ha ka jingpule.
“Ka Sorkar kala kyrshan ruh ia ki nongrep bad ki nongseng kam lajong kiba dei ki riewlum, ha kaba ki mar khlaw kiba ioh ia ka Minimum Support Price (MSP) kila kiew na 12 sha ka 87 tylli kaba plie ia ki lad kamai jakpoh bathymmai ia ki riewlum,” long u Myntri ka sorkar pdeng.
Ula pynpaw iaka jingsngewsarong ban iadon bynta ha kane ka jingrakhe ha Meghalaya, ka jylla kaba riewspah ha ka deiriti riewlum.
“Kane ka jingwan jong nga kala ai shibun ki jinghikai ia nga. Ngan shim ia kine ki jinghikai kiba nga la ioh hangne bad pyndonkam ia ki ban ai jingshakri ba kham bha ia ki briew jong nga,” ula ong.
Kum u Myntri uba khmih ia ka Tnad Civil Aviation, u Rammohan Naidu Kinjarapu ula pynpaw ia ka jingdonkam ban kyntiew ia ki lad ha ka leit ka wan ha ka thain shatei lammihngi, khamtam ha Meghalaya bad ula kular, ba ka Sorkar India kala kut jingmut ban kyntiew ia ki lad ka leit ka wan lyngba ki liengsuin ha kane ka thain.
Ula kren ruh shaphang ki jingpyrshang ka Sorkar ban kyntiew ia ka kad liengsuin Shillong Airport khnang ba ki liengsuin kiba kham heh ki lah ban wan sha kane ka kad liengsuin bad kumta, ki briew nangne ki lah ban leit beit beit sha Delhi.
U Myntri ka Sorkar Pdeng ula ai ruh ia ka jingkyrshan halor ka jingthmu jongu Myntri Rangbah u Conrad Sangma ban kyntiew ia ki lad ka leit ka wan sha Tura bad kiwei kiwei ki jaka jong ka jylla kiba jynjar ban poi, kaba kynthup ia ka jingwanrah ia ki liengsuin kiba lah ban pynher na ki jaka ba don um.
“Ngi sngewthuh ia ki jingeh kiba wan namar ka jinglong jong kane ka jaka hynrei ngi kut jingmut ban kyntiew ia ka Meghalaya kum kawei na ki nongialam ha ki kam pynher liengsuin. Ka jingpyniar ia ki kad liengsuin bad ki lad ka leit ka wan kiba kham bha kin plie ia ki lad ka ioh ka kot jong ki briew ka Meghalaya,” la ong u Myntri ka Sorkar Pdeng.
