Shillong, Nailar 23 : U MLA ka Liang Pyrshah na Mawsynram, Bah Himalaya M Shangpliang u la buh jingkylli ia ka sorkar jylla ia kaei kaba ka la leh halor ka jingbym pyllait shuh ka sorkar India ia ka skhim ha ki shnong khappud ba ju tip kum ka skhim Border Area Development.
U Bah Himalaya u la iathuh ba mynta la arsnem kynthup naduh u 2021-2022 bad jong u 2022-2023, ki shnong khappud ki khlem ioh shuh ia ka skhim border area kumba ki ju ioh manla u snem ban leh shibun ki kam pynroi ha ki shnong khappud.
La iathuh ba ki kam kiba ki shnong khappud ki ioh ban pyntrei na katei ka skhim ki long naduh ka jingshna ia ki surok, ki iing skul, ki community hall bad kiwei kiwei ki kam pynroi kiba iadei bad ki paidbah. “Hynrei mynta la ar snem ngi khlem ioh ei ei shuh,” ong u MLA.
U ong ruh ba ha ki hynriew bnai mynshwa ,u la dep ban rah ia katei ka jingkylli ha Iing Dorbar hynrei ka jubab kaba u ioh ka long beit ba ka sorkar jylla kan sa ia kren bad ka sorkar pdeng.
“Mynta ka elekshon ka la jan, ki paidbah ruh ki la khmih lynti ba kin ioh ia ki kam pynroi kumta ka sorkar jylla kumjuh ka tnad Border Areas kadei ban ai jubab halor kane,” u la ong.
U Bah Himalaya u iathuh ruh ba man u snem ki shnong khappud ki ju ioh kumba 2 klur tyngka na ka skhim Border Area bad kumta ka jingduh jong ki paidbah ha kine ki ar snem ka la long kaba jur.
