Shillong, Nov 13: Ka Langsning FC kala pynrem da 3-2 ia ka Ryntih FC ha ka jingiakhun ha ka OC Blue Shillong Premier League 2024 kaba la long hynne ka sngi Balang ha SSA Stadium, First Ground, Polo.
Katba ka jingiakhun hapdeng ka Sawmer SC pyrshah ia ka Nongthymmai SC kala kut ha ka jingiakhaid da 1-1.
U Dajiedlang Wanshnong ula thep ia ka kol ha ka minit kaba 35 bad 70 bad u Ronney Chel Khongrangjem ula thep ia ka kol ha ka 90’+1 kaba la pynthikna syndon ia ka Langsning ban khur iaka jingjop.
Katba ia ka Ryntih u Dameki Khongstia ula thep kol ha ka 58 minit bad u Damonlang Pathaw ula thep ia ka kol ha ka 63 minit.
Ka jingiakhun hapdneg kine ki ar tylli ki kynhun kala long kaba itynand ha kaba kila ioh ban tam mar kylliang ha ka jingioh thep kol hynrei dei ha ka minit kaba khatduh ba ka Langsning kala ioh thep ia ka kol ban khur ia ka jingjop.
U Dajiedlang jong ka Langsning ula dei ban ioh ia ka hat-trick hynrei da ka jingtbit u nongap kol ka Ryntih u Luckystar kumta ym shim la lah ban thep ia ka kol.
Kane ka jingjop jong ka Langsning kala pyllait iaka na ka jingshah pynhiar kyrdan bad mynta kala kiew sha ka kyrdan kaba 7 da kaba ioh 6 point, katba ka Ryntih mynta kala don sha trai duh.
Ha ka jingiakhun hapdeng ka Nongthymmai pyrshah ia ka Sawmer, ha ka kylla step ka Nongthymmai kala ioh ia ka Penalty ha kaba u Ronald Singh Shaikhom ym shim la pynlehnoh ei bad ula ioh ban thep ia ka kol.
Ka Nongthymmai kala mad iaka jingduhnong hadien ba u Michaelson Kurbah ula ioh ar tylli ki Yellow Card bad ula duh noh ban ialehkai bad kane kala buh ha ka jingeh kaba khraw ha kaba ka Nongthymmai kala hap ban pynkhlain noh ia ki nongialehkai shadien khamtam haba ki nongialehkai ka Sawmer kila pyrshang dohiap ban thep kol ha ka kylla miet bad kila ioh bun tylli ki kabu ia kaba kim shym la lah ban pat ban thep kol.
U Diego Khyriem ula ioh ia ki kabu ban thep kol hynrei dei ha ka minit shwa ban kut ka jingiakhun ba ula ioh thep ia ka kol ban pyniakhaid syndon ia kane ka jingiakhun.
Ka Sawmer kala don ha ka kyrdan kaba 3 da kaba kamai 8 point katba ka Nongthymmai kala kiew sha ka kyrdan kaba 4 da kaba ioh 7 point.
