Mudui ka NEHUSU sha ka President ka India ba jah klep u VC | Dawa weng kam noh mardor

Shillong, Naiwieng 11 : Ki samla pule ka North Eastern Hill University (NEHU) ha ka sngi Nyngkong, kila mudui sha ka President ka Ri India Droupadi Murmu ia ka jingjah klep u Vice Chancellor PS Shukla napoh University haba dawa ruh ban wengkam noh mardor ia u halor ka jingkynnoh ba um shym la lah ban pynbeit ia ki kynrum kynram hapoh ka University.

Ia kane ka shithi mudui la phah lang da ka North Eastern Hill University Students’ Union (NEHUSU) bad ka Khasi Students’ Union (KSU)-NEHU Unit, kiba lamkhmat ia ka jingiakhih shong shah thngan kaba la iaid mynta la 7 sngi.

Ka shithi kala ong ba u VC ula shu jah klep bad khlem wan trei ban pyndep iala ka jong ka kamram hapdeng ka jingiashah thngan jong ki samla pule hapoh ka University.

“Kala iaid la 7 sngi (146 kynta) naduh ba sdang ka jingiashah thngan bad wat katne sngi kala iaid ka jingiakhih ki samla pule, u VC u khlem lah ban pyndep iala ki jong ki kamram. Ka jingjah trei jong u VC, khlem da pyntip lane ai jingtip, ka dei kaba sngewkhia bha bad ka pyni ruh ia ka jingtlot ha ka jinglong nongialam bad ka jingbym lah jong u ban leh eiei halor kane ka kynrum kynram ba dang iaid mynta” ong kine ki seng ki samla pule haba bynrap “Ha ka jaka ban bunkam ha kaban pynbeit ia ki kam ba iadei bad ka jingiashah thngan, u VC um shym la leh eiei lane jah ruh napoh ka campus, kaba pyni ia ka jingbym ler jong u ban tehlakam ia ka jinglong jingman”.

“Halor kine kiei kiei baroh, ki samla pule ki sngew ba u VC um lah shuh ban ialam ia ka University. Ka jingbym ler jong u, ka jingbym shimkhia bad ka jingbym khein kor ia ka bha ka miat jong ki samla pule kala ktah jur bha ia ka burom jong ka skulbah. Ka union namar kata, ka kyrpang ba dei ban weng noh mardor ia u VC na ka shuki ba u bat” kila dawa.

“Ngi kyrpad da kaba burom ia ka Ophis jong phi ban leh eiei noh mardor ha kaban pynbeit ia ki kam ki jam bad pynthikna ba ka Univeristy kan treikam shaid shaid khlem ka jingthut na ka bynta ka jingmyntoi ki samla pule jong ka” bynrap ka shithi.

Nalor kane, kine ki seng samla pule kila pyntip ba ka jingiashah thngan kala sdang ban ktah bha ia ka koit ka khiah jong ki samla pule kiba iakhih.

“Kiba bun napdeng jong ki, kila poi hospital namar ka jingkem tlot kynthup ia ka jinghiar ka Blood Pressure bad ka shini ha ka snam. Ka jingbym don u VC, nalor ka jingbym pyntip lano ba un wan, kala buh ia ka jingim jong ki samla ba iakhih hapdeng ka jingma” kila ong.

Ha kajuh ka por, ka Vice President jong ka KSU-NEHU Unit Cecelia Pyngrope kala shah pynkit noh sha hospital hadien ka jingkem tlot na ka jingshah thngan kaba la jam sha ka sngi kaba 7.

Baroh lang, haduh 9 ngut ki samla pule kila poi hospital haduh mynta, ia kaba 4 ngut la pyllait noh bad kila wan phai biang sha ka jingiakhih.

Ha ka sngi U Blei, ki bor pyniaid ka NEHU kila ujor ejahar pyrshah ia ka jingshah lun maw ka iingsah bad ka kali jong u Vice Chancellor ka NEHU ha ka miet sngi Saitjain. Ki Pulit kila pynkhlain bha ia ki bor pahara hapoh ka campus ka University.