Shillong, Nailar 22: U Myntri ka Tnad Public Health Engineering (PHE) Bah Renikton Lyngdoh Tongkhar hynne ka sngi nyngkong ula ong ba ka Ophis ka Comptroller Auditor General of India (CAG) kan hap audit ia ka jingpyntreikam ia ka Jal Jeevan Mission (JJM) hapoh ka Jylla.
“Ka JJM hi kan hap ban iaid audit da ka CAG kumba leh ia kiwei kiwei ki skhim ka Sorkar Pdeng” ong u Bah Renik haba iakren bad ki nongthoh khubor.
U pyntip ba ka Ophis ka CAG kala dep ban leh ia ka audit dang shen bad ki don ki jingshem barit baria ki bym biang bad ia ka kaiphod yn sa rah ha ka Iingdorbar thaw ain.
Haba pynpaw ba ka lad ban pyndonkam bakla ia ka skhim ka duna bha, u Bah Renik ula ong ba kane ka long namar ba ka Ministry of Jal Shakti kala buh kongsan ban don ia ka mamla balai (third party) ka ban peit ia ka rukom pyntreikam ia ka skhim.
“Ki Contractor kin ioh ia ki bill jong ki hadien ba kane ka mamla ba lai kala pynthikna ia ka jingpyntreikam bad janai bha jong ka kam” ula ong haba bynrap “Kane ka mamla balai ka hap ban leit jurip ia ki kam ba pyntrei da ki contractor, kiba hap ruh ban batai kam da ki Engineer”.
U Myntri u pyntip ba ka skhim ka hap ruh ban don ia ki Village Water Sanitation Committee. “Ki don bun ki bor khmih ban pynthikna ia ka jingjanai ki kam jong ka JJM. Ta ka daw nga artatien ba ka don ka jingpyndonkam bakla ia ka skhim”.
Halor ka rai jong ka Sorkar ban thung da u Ophisar Indian Raiway Traffic Service (IRTS) kum u Commissioner & Secretary ba khmih ia ka Tnad PHE, u Myntri ula ong ba une u Ophisar u lah ban bat ia kane ka kam kat kum ka All India Service Rules.
“Nga tharai ruh ba ka shong ha ka bor sngewthuh jong ka sorkar ia ka jinglah treikam jong une u Ophisar. Lada ki lah ban treikam bad pyndep ia kaei kaba dei ban leh, ngim don jingsngew eiei” ula ong.
Ula kubur ruh ba ia kane ka rai la shim namar ka jingduna palat ki Ophisar Indian Administrative Service (IAS) hapoh ka Jylla.
“Ka dei ka jingshisha kumba phi iohi baka jingdon ki Ophisar IAS ha Jylla ka duna bha haba nujor bad ka jingdonkam jong ka Jylla” ong u Bah Renik.
Kat haduh mynta, ka Sorkar Pdeng kala dep ban pyllait haduh T. 678.39 klur ka pisa sha ka Jylla ban pyntreikam ia ka JJM na ka bynta u snem 2021-2022, kaba long haduh saw shah ia kaba la ai ha u snem 2020-2021.
Ki don haduh 5.90 lak tylli ki Longiing ha ka Jylla ha kaba haduh 1.88 lak tylli (31.94%) kila ioh ia ka um ha Iing. Ha u snem 2021-2022, ka Sorkar ka buh thong ban pynpoi um iing sha kumba 3.39 lak tylli ha ki jaka Nongkyndong.
