Shillong, Naiwieng 06: Ka Chipakkore kala ioh rung sha ka Quarterfinal jong ka Meghalaya State League da kaba pynrem ia ka Pinggera Do•gisik da 3-2 ha ka jingiakhun kaba khatduh ha ka Group A kaba la long hynne ka sngi Balang ha Tura.
Ka Chipakkore kala donkam beit ban khur ia ka jingjop ban ioh rung sha ka Quarterfinal bad kala ioh khur 7 point bad ka Lumsohkhlur kaba la ioh 6 point kala wan noh ha ka kyrdan ka baar.
Ha ka Group B ka Mawten kala pynrem iaka Riangdo Youth da 3-1, ha kaba u Arnest Lyngdoh ula ai ka jingkyrmen iaka Mawten da ka jingioh thep kol ha ka minit kaba 3, hynrei u Kordor Amora ula ioh ban pyniakhaid ha ka 62 minit ha ka jingiakhun kaba la long ha Mawkyrwat. Ka jinglong jingman jong ka jingialehkai kala paw kumba kan kut ha ka jingiakhiad hynrei u Arrowstar Wanniang ula thep ia ka kol ha ka minit kaba 90’+1 bad u Wiseman Kharsyiemiong ula thep ha ka minit kaba 90’+5 kaba la pynlong ia ka Mawten ban ioh khur ia ka 3 point.
Kane ka jingjop kala pynlong mynta ia ka Mawten, Khliehmawlieh bad Sutnga ban ia ioh mar 6 point ha katei ka group. Kumta ka Tournament Committee jong ka MSL kan sa pynshai ia ka jingbat kyrdan kitei ki kynhun hadien ka jingwai jong ka jingialang kaban long lashai ka sngi Palei.
Ha Khliehriat, ka Rymbai Skhenshynriah kala pynrem ia ka Mulait United da 3-0 ha kaba u Hesmiki Rymbai ula thep ia ka kol ha ka 39 bad 58 minit bad u Iaishah Bareh ula thep ha 52 minit hynrei kane kam pat long pat kaba biang ia ki ban ioh knieh ia ka kyrdan kaba nyngkong na ka Rangdajied United kaba ioh lang mar 7 point hynrei ka Rangdajied kala tam ha ka jingioh thep kol, hynrei ka Rymbai Skhenshynriah kala ioh rung sha ka Quarterfinal kum ka kynhun kaba wan baar ha ka Group.
Ha ka Group F, ka jingiakhun hapdeng ka Pynursla United bad ka Mawmluh kala kut ha ka jingiakhaid da 2-2. U Riborlang Dkhar ula thep ia ka kol ha 7 minit bad u Seiborlang Khongmawloh ula thep ha ka 24 minit na ka bynta ka Pynursla United hynrei u Balajiedlang Lyngwa ula ioh ban pyniakhiad da kaba the par kol ha ka 37 bad 82 minit ban ia sam lang ia ka point.
Ka jingiakhun kaba khatduh jong ka Group C kan long lashai ka sngi hapdeng ka Seven United bad ka Nangkiew Shaphrang Lumdiengngan ban iaknieh ban wan baar bad kine baroh ar tylli ki kynhun kila ioh mar 3 point hynrei ka Lumdiengngan kala tam ha ka jingioh thep bun kol.
Ka resol mynta ka sngi:
Group A (Tura): Pinggera Do•gisik 2 – 3 Chipakkore
Group B (Mawkyrwat): Riango Youth 1 – 3 Mawten
Group D (Khliehriat): Mulait United 0 – 3 Rymbai Skhenshynriah
Group F (Shillong): Pynursla United 2 – 2 Seng Samla Mawmluh
