Shillong, Naiwieng 05 : Ka Kynhun Myntri ka Sorkar Jylla ha ka sngi Ba-ar, kala mynjur ban pynkylla thymmai ia ka Amendment jong ka Meghalaya Forensic Science Laboratory Rules, 2021, na ka bynta ban pynkha ia bun ki kam ha ka Mobile Forensic Crime Scene Unit.
Haba kren sha ki lad pathai khubor, u Myntri Sorkar Bah Paul Lyngdoh ula ong “Kane ka jingpynkylla ka dei na ka bynta ban pynkha ia ka Mobile Forensic Crime Scene Unit bad ka Kynhun Myntri kala mynjur ban pynkha ia bun ki kam ban thung ha ka Mobile Forensic Crime Scene Unit, ka ban iarap ha ka jingleit lum sakhi ia ki kam bymman kaba mut ba ki Ophisar kin ioh ia ki kali bad kin iarap ban lap kloi ia ki briew ba donkti ha ki kam bymman”.
“Ngi la mynjur ruh ia ka jingtyrwa ban don ia u Scientific Officer, Senior Scientific Assistant, Scientific Assistant bad Laboratory Assistance ha baroh ki District ka Jylla. Ia kane la leh namar ka Crime scene detection kam don satia ha ka Service rules tad ynda ka Kynhun Myntri kala wanrah ia kane ka mat hynne ka sngi” ula bynrap.
Haba kylli, u Secretary ka Tnad Home (Police) Bah Cyril Diengdoh ula ong ba kat kum ka Criminal Code ba thymmai, ka BNSS u snem 2023, kaba treikam naduh ka 1 tarik Naitung mynta u snem, ka don ka jingdonkam kat kum ka kyndon 176 (3) jong ka BNSS ba ia ki katto katne ki kam bymman ba shyrkhei, ki kynhun tohkit mobile forensic ki hap ban leit lum ia ki sakhi satar.
“Kane ka dei kaba donkam kat kum ka Ain. Ban iaid kat kum ka Ain, ka Sorkar kala mang ia kine ki kam kham hashuwa. Ka jingthungkam kala sdang bad ha ka jingshisha, ka don ka jingdonkam ba dei ban pynthymmai ia ka Service Rules namar jong kane ka shnat treikam ba thymmai ha ka Forensic Science Directorate bala tip kum ka Mobile Forensic Crime Scence Unit” ula ong.
