Shillong, Naiwieng 05 : U Myntri bad Nongaiktien Sorkar Bah Paul Lyngdoh ha ka sngi Ba-ar, ula ong ba ka jingplie biang ia ka surok Them Iew Mawlong kam don jingiadei eiei ruh em bad ka rai ban pynkynriah ia ki 342 tylli ki Longiing na Them Metor.
Haba iakren sha ki lad pathai khubor, u Bah Paul ula niew ia ka rai jong ka Sorkar kum kaba iahap bha namar ka jingkhapngiah ki surok ban iaid kali bad ki jingeh bala buh ia ki paidbah ha ka leit ka wan ha kine ki 6 snem bala leit noh.
“Ngam iohi ia ka jingdon jingiadei hapdeng katei (plie surok) bad ka rai ban pynkynriah ia ki longiing na Them Metor” ula ong.
U Bah Paul ula kynthoh ia kane halor ka jingartatien ba pynpaw da ki Sengbhalang bad ki seng sain pyrthei ba ka jingplie biang ia kane ka surok kan nang pynslem arshah ia ka jingpynkynriah ia ki longiing na Them Iew Mawlong.
Ia kane ka surok la plie biang ha ka 4 tarik Naiwieng bad la shah iaid ia ki kali tang hapdeng ka por 8 baje mynstep haduh 4 baje janmiet.
“Ha ka jingshisha, ha kine ki 6 snem ki kam ki kam kim shym la long kiba biang nalor ba katei ka jaka ka dei ka jaka ba pynmih ia ka jingiakynad hynrei mynta kiei kiei baroh kila jai jai bad ki briew kila ia iaid ia ieng na katei ka jaka bad mynta sa ki kali kila iaid kumba ki ju long baroh shikatta. Kane ka dei ka sienjam kaba kongsan bha ha kaban pynduna ia ka jingkhapngiah jong ka nongbah Shillong. Phi top bha ia ka jingdheng kali hangne” ong u Myntri.
U Bah Paul ula bynrap “Ka Sorkar Jylla kala iai ban na ka por sha ka por ba kan pynbeit ia kane ka kam bad kala kut jingmut shisha ban pynurlong ia kata. Ka jingplie biang ia ka surok Them Iew Mawlong kam don eiei bad ka rai halor kane ka kam Them Metor”.
