Shillong, Naiwieng 05 : Ka Kynhun Myntri ka Sorkar Jylla ha ka sngi Ba-ar, kala ai jingmynjur ia ka amendment (jingpynkylla thymmai) ia ki kyndon jong ka Meghalaya Building Byelaws ban tehkyndon ia ka kam trei jingtei ha ki Industrial Zone, ba kynthup ha Mawkhanu bad Mawkasiang kiba hap hapoh ka New Shillong Township.
Haba kren sha ki nongthoh khubor hadien ka jingialang, u Myntri Sorkar bad Nongaiktien ka Sorkar MDA Bah Paul Lyngdoh ula ong “Ka amendment ka dei kaba la leh halor ka jingdonkam ban pyniapher ia ki Industrial Zone ka bym shym la don mynshwa bad ka donkam ia ka amendment jong ka Building Bye-laws ia kine ki Industrial Zone”.
“Kumba phi iatip ba ka jingpynheh kiba jia mynta khamtam ha New Shillong City ka dei kaba hap ban da pyrkhat ne plan ha ka rukom kaba dei, ta ka daw ngi donkam ban don ia ki kyndon ba thymmai jong ka byelaw ia ki Industrial Zone” ula bynrap.
Haba kylli, u Myntri ula ong ba kine ki kyndon ba thymmai kin treikam ha ki jaka bala ithuh kum ki Industrial Estate ha kylleng ki jaka ka Jylla namar ka jingpynheh ia ki jaka sor ki dei ki kam kiba iaid na ka por sha ka por.
La ka Sorkar kala ithuh ia ki Industrial Zone ha New Shillong City, u Bah Paul ula ong “Em, ha ki jaka kum ka Mawkhanu bad Mawkasiang, ngi la don ia ki jaka ba don ki karkhana bad ruh ha ki jaka kiba la thied noh da ka Sorkar Jylla”.
