Shillong, Naiwieng 04: Ka jingpynkhreh kala iaid shakhmat naka bynta ban pynlong iaka jingialehkai jong ka Ranji Trophy 2024-25 Elite Group A ha MCA Ground, Polo ha kaba ka Meghalaya kan iakhun pyrshah ia ka Jammu and Kashmir kaban sdang naduh ka sngi Balang.
Ki nongkhmih bad ki nongtrei kila pynbit pynbiang ia ka madan ialehkai mynta da ki bnai khnang ba katei ka jaka ialehkai kan long kaba biang bha bad wat ki heh jong ka BCCI kila ai ka jingiaroh iaka rukom pynbit pynbiang ia katei ka madan ialehkai.
“Ka long ka khyllip mat kaba sngewsarong ban ioh iaka jingiaroh na ki BCCI Neutral Curators, Match Referees, Umpires bad ki nongialehkai cricket na kiwei pat ki jylla halor ka jingling jingman jong ka madan ialehkai ka jong ngi” la ong u President ka MCA u Nababrata Bhattacharjee bad ka “Baroh na ki, kila ong ba ka madan ialehkai ka jong ngi kadei kaba wan ha ka kyrdan kaba 7-8 hapoh ka ri”.
Katei ka jingai jingithuh kadei kaba ai mynsiem ia ka MCA ban kiew shuh shuh shajrong.
Ka Meghalaya kala rem ha ki 3 tylli ki jingiakhun pyrshah ia ki kynhun kiba khlain hynrei ha ka jingialehkai kaba khatduh ka Meghalaya kala lah ban kamai haduh 461 run ha ki ar tylli ki Inning bad kala don ka jingkiew haka rukom ialehkai hynrei ki nongialehkai ka jylla ki dang donkam pat ban ialehkai bha shuh shuh ban ioh khur ia ka jingjop.
Ka Jammu and Kashmir kala iakhaid ha baroh ar tylli ki jingiakhun hynrei kala ioh ban pynrem ruh ia ka Services da ka inning bad 25 run ha Srinagar dang shen.
U Bhattacharjee ula ai khublei kyrpang ia u MCA curator u Peter J Lamare uba la ioh ia ka jingithuh na ka BCCI kum u Curator bad u Chief Groundsman u Pobitro Rabha bad ia baroh kiba pynbit pynbiang ia ka madan ialehkai.
