Shillong, Jylliew: U MLA/MDC barim ka Mylliem Constituecy Bah Pynshai Manik Syiem, ula rai ban wanphai biang sha ka kam sain hima sima da ka jingpynkhreh ban iakhun ia ka elekshon MLA 2023 na Mylliem Constituency hadien ka jingshah rem ha u snem 2008.
Haba iakren bad ka Shlem, u Bah Pynshai ula ong “Kane ka rai kaba nga shim ban mih aireng biang ha kane ka elekshon kadei kaba la rai hadien ka jingiasyllok bad ka jingiashong pyrkhat kaba sani bha bad ki riew rangbah khamtam kito kiba la donlang syndah jong u naduh ki snem ba la lah”.
Haba pynpaw ba kane ka jingwanphai biang sha Mylliem ka dei namar ka jingkwah ban tei biang ia ka jingiadei bad ki nongshongshnong ka Mylliem Constituency, u Bah Pynshai ula ong “ Watla ngam shym la long Nongmihkhmat la bun snem na ka Constituency hynrei ngam shym la pynkut ia ka jingiadei jong nga bad ki paidbah. Hooid ngam shym la don shuh ha syndah jong ki hynrei ka Khun jong nga, ka Kong Teilinia Thangkhiew kala iadon ryngkat bad ki ha kine ki snem bala leit noh kum ka MDC”.
“Nga kwah ban leh shibun ki kam ba khraw na ka bynta ka lawei ban sa wan ym tang jong ka Mylliem Constituency hynrei jong ka Jaidbynriew khamtameh ban kren ia ki ishu jong ka Jylla ha ka Iingdorbar Thaw Ain ka Jylla” ong u Bah Pynshai.
Haba kylli ia ka Party kaba u jied ban mih aireng ha kane ka elekshon ban wan, u Bah Pynshai ula ong “Nga la ju long bad jop kum u kyrtong shimet ha ki elekshon bala dep hynrei ha u snem 2008 namar ba nga iakhun na ka ticket jong ka NCP, ki paidbah kila kyntait ba ka dei ka party nongwei, kumta nga la shah rem noh”.
“Ka jinglong kyrtong ne MLA shimet ruh ka don ka jingmyntoi kaba khraw bha namar haba long shimet, iohlt ka hok ban kren ne ong eiei namar kam don ka jingteh ha ki kyndon jong ka party” ula ong.
U Bah Pynshai ula iathuhba ha ka por ba u shah jied kum u MLA ha ka sien ba nyngkong, ka Mylliem Consitituency ka dei kaba dang sah shrah bha ha baroh ki liang, ym don surok,ym don iingdorbar shnong, ymdon madan ialehkai kiba biang, ki iing skul kiba bang hynrei wat hapdeng ka jingioh ia ki skhim kaba rit, da ka jingstad kaba ai U Blei, ula lah ban leh shibun kiei kiei na ka bynta ka Constituency bad noh synniang ia ka Jylla da ka jingiatai ia ki ishu ha IIngdorbar Thaw Ain.
Une un MLA/MDC ula ong ba ka jingwan phai biang jong u sha ka sain hima sima ka dei ka kam mishon ym ka kam ban leh business ne pynlong kam khaii ia ka.
