Kwah ka KHADC ban pynkylla ia ka ST Order 1950 ban ithuh noh tang ki riewlum trai Jylla kum ki ST

Shillong, Risaw 30 : Ka Khasi Hills Autonomous District Concil (KHADC) kala rai ban buddien noh shaid shaid bad ka Sorkar Jylla ba kan kyntu ia ka Sorkar Pdeng ba kan pynkylla thymmai ia ka Constitution (Scheduled Tribe) 0rder, 1950, ban ithuh noh tang ia ki riewlum trai Jylla kum ki ST ha Meghalaya.

Kane ka rai ka dei kaba la shim hadien ba ka KHADC kala iohpdiang ia ki jingujor pyrshah ia ka jingioh thied jaka pathar da ki briew nabar ka Jylla ha Pillangkata, Ri-Bhoi District kaba don ha khappud ka Assam.

Haba iakren bad ki nongthoh khubor hadien ka jingiakynduh ia u Lat ka Jylla CH Vijayashankar ha ka sngi Balang, u Chief Executive Member (CEM) ka KHADC Bah Pyniaid Sing Syiem ula ong “Ngi la iohpdiang dang shen ia ki jingujor pyrshah ia ka jingioh thiah jaka pathar da ki briew kiba dei nabar Meghalaya ha ka thain Pillangkata. Ngi la iakren bad ka Sorkar Jylla halor ane ka kam namar lada ngi iakren ia ka Meghalaya Land Transfer (Regulation) Act, kala khang ia ki briew nabar ka Jylla ban thied jaka hapoh ka Jylla Meghalaya.

“Hynrei, kane ka Ain kam khang satia ia ki briew kiba dei ki riewlum jong kiwei pat ki Jylla bad ruh kiba la ithuh kum ki Scheduled Tribe ha ka Jylla Meghalaya. Kane kala pynkha ia shibun ki jingeh ia ngi. Ta ka daw, ngi la kyntu ia ka jingdon kam ban pynkylla thymmai ia ka Constitution (Scheduled Tribe) Order, 1950, ka ban kren shai mano ba dei ki riewlum trai Jylla ka Meghalaya”.

“Kat bym pat pynkylla ia ka 1950 order, bun ki briew, kiba dei ki ST jong kiwei ki Jylla kum ki Naga, Mizo bad kiwei, kila thied jaka ha Pillangkata ia mynta. Ki lah ruh ban don ki bar jylla, kiba la ioh ban thied jaka hangtei” ula ong haba kular ba “Kane ka Executive Committee (EC) ba mynta kala shimkhia bha ia kane ka kam bad kala iai buddien khlem sangeh bad ka Sorkar Jylla”.

Nalor kane, u CEM u pyntip ba ka Executive Committee kala pynkhamti ha ka Tnad Elaka bad ka Tnad Land jong ka Council ba kin pynbeit ia kan eka kam bad lada donkam,kin shim ia ka rai ba tyngeh ban pynbeit ia kane ka jingthied jaka ki briew nabar Jylla,kaba la jia mynta ha khappud ka Assam.

Haba kylli, u Bah Pyniaid ula ong “Hadien ba ioh pdiang ia ki jingujor, ngi la khot hajir ia u Syiem ka Hima Mylliem namar Syiem ka Raid Marwet u hap hapoh ka jingkhmih ka Hima Mylliem bad mynta kaei kaba ngi la leh ka long ba ngi la pyn khamti ia ka kam sha ka Elaka bad ka Tnad Land bad kila thung ia kawei ka Committee ba kan khmih ia kane ka kam”.

“Ngi la kren shai bha ba ngim kwah ia kum kine ki jingjia kin jia ha kiwei ki bynta jong ka thain. Kumta, ngin pyrshang kat ba lah ban pynsted ia ka jingtreikam ka Committee bad lada dawa ka kam, ngin sa shim ia ka sienjam ba tyngeh halor kane ka kam” ula kular.

Ha kajuh ka por, u Bah Pyniaid ula ong ba ka KHADC kan ym pdiang satia ia ki aplikeshon ban register ia ka jaka da ki briew kiba dei nabar ka Jylla.

“Namar kata, ailad ia ka Committee ba kan bishar ia kane ka kam bad shim ia ka rai kaba dei ban shim. Ngin ym pynhun satia iano iano ruh hynrei ngin leh ia kaei kaba dei ban leh na ka bynta ban iada ia ka khyndew ka shyiap jong ngi” ula ong.