Shillong, Risaw 29 : Uwei u Heh Ophisar ka Sorkar Jylla ula ai jingmut ban “khang dam noh ia ki jaka rung jong ki par dewiong bala shu ieh shrah da kaba pynbthei bomb khnang ban khanglad ia ka jingtih thymmai” naba kine ki par ki dei kiba don sha ki jaka ba sha kyndong ym tang ba ju eh ban poi hynrei ba jynjar ban peitngor.
Kane ka jingai jingmut kala paw ha ka interim report ba 25 jong ka Justice Brojendra Prasad Katakey Committee, ha kaba kane ka jingai jingmut kala mih na u Additional Deputy Commissioner (ADC) ka South West Khasi Hills District ba dei khmih ia ka Ranikor Civil Sub Division.
“Ki par dewiong ha ka District ki don sha ki jaka ba kyndong bha bad ba iar bha. Ka jinglong ki jaka ka dei kaba syllang bha bad bun ki dei ki bym lait iaid kali. Ki don ruh bun bah ki par dewiong bala shu iehshrah, katto kane ki dei kiba dang suk bha ban pynim biang ne sdang biang ia ka jingtih dewiong tang ha ka pork aba lyngkot” ong u ADC ha ka kaiphod.
Une u Heh Sorkar ula bynrap ba wat ki nong Bangladesh kila rung tuh sha India bad kila tih ia u dewiong na ki par bala shu ieh shrah bad kit pat ia ki sha Bangladesh. “Ki nong Bangladesh kila wan rung beain bad tih sopsop ia u dewiong sha ki jaka ba kyndong bha da ka jingthmu ban kit ia u dewiong sha Bangladesh. Ha ki snem bala leit noh, kila don ki jingjia bala register case pyrshah ia kane ka jingwan tuh dewiong da ki nong Bangladesh” bynrap ka kaiphod u ADC.
Kat kum ka jingong jong u, katto katne na kine ki par bala ieh shrah ki don sha ki jaka ba kyndong bha bad kiba lah ban poi tang da kaba iaid kjat da ki mile. Kumta, kam long kaba suk ban khmih ia kine ki par baroh 24 mynta ha ka shisngi.
“Kumta, la kyrpad ban ai jingbit, ai jingiarap khnang ban ailad ia uba soi kyrteng ban shu pynbthei noh da u bomb ban khang ia ki jaka rung jong ki katto katne ki par ban lait na ka jingtih thymmai biang” ong u ADC.
Ka kaiphod ka ong ruh ba ha ka jingbym don ki drone, “ka jingjurip bad jingpeitngor ka long kaba jynjar bha bad ka bym lah ban leh eiei, kaba lam sha ka jingpynsyrwa kai ia ka por bad ka jingiaid kjat ban leit sha kine ki par ba suba tih thymmai”.
U ADC bad kiwei ki Heh Sorkar kila pynlong ia ka jingtohkit ha ka thain Diengngan myn ha ka 4 bad 5 tarik Nailur mynta u snem bad shem ia “ki jaka sah ba shipor ha ka thain bad ki dak ki shin ba don ka jingtih dewiong dang shen ha ki katto katne ki jaka kiba jynjar ban poi”.
Ym shym la lap briew satia ha kane ka jingleit jurip, hynrei “ki don katto katne ki dak ba paw ia ka jingtih dewiong thymmai” ong u ADC.
Kiwei ki Heh Ophisar kila pyntip ia kajuh ka jingshem ha ka jingleit jurip ia kine ki par dewiong bala iehshrah bad ong ba ha ka kine ki sngi ba leit jurip, ym shym la lap satia ia kano kano ka jingiatih dewiong.
U Justice Katakey ha ka kaiphod ba 25, ula ai jingmut ba ki SOP bala pynmih ha ka Interim report ba 24 dei ban pynbna paidbah noh “ban khanglad ia ka jingshalan ia u dewiong bala tih beain ha Meghalaya ha ka nam ba ia u dewiong la thied na shabar ka Jylla Meghalaya”.
Ka Committee kala ai jingmut ruh ban ithuh ia katto katne ki jaka na ka bynta ban pynieng ia ki Smart Integrated Check Gate na ka bynta ban pyntreikam ia ka SOP. La ai jingmut ruh ban leh survey na suin manla ka por bad shim ia ki sienjam ba dei ban shim kat kum ki kyndon ka Mines and Minerals (Development and Regulation) Act, 1957 (MMDR Act, 1957).
Kala ong ruh ba ka North East Space Application Centre (NESAC) bad ka Tnad Mining and Geology ki dei ban pynlong ia ka jingialang ban wad ia ki lad ki lynti ha kaban lah pynlong ia ka survey na suin.
