Shillong, Oct 28: Ka lahduh jong ka MSL ka Rangdajied United FC kala sah ha ka jingkyndit ha ka sngi Nyngkong namar ka jinglah ban tehlakam ka Rymbai Skhenshynriah ban pynkut ia ka jingiakhun ha ka jingiakhaid ba khlem kol ha ka Group D jongka Meghalaya State League 2024 kaba la long hynne ka nsgi Nyngkong ha Khliehriat.
Ha ka jingiakhun ha Mawkyrwat, ka Khliehmawlieh Youth Club kaba la wan baar ha ka MSL kala shah pynrem ha ka Mawten SC da 2-1 ha ka Group B, katba ka Mawlai SC kala pynbam da 16-0 ia ka Seng Samla Mawmluh ha ka jingiakhun ha ka Group F kaba la long ha Shillong.
Ka Mawten kala thep 2 kol lyngba u Oversharp Iawphniaw ha ka minit kaba 54 bad 87, katba u Livingstone Nongrang ula thep ia ka kol ha ka minit kaba 52 na ka bynta ka Khliehmawlieh.
Ha Shillong, ki nongpeitkai kila ioh ba nsakhi iaka jingshah pynrem ka Seng Samla Mawmluh da 16 kol ha ka Mawlai SC ha kaba u Khrawkupar Jana ula thep iaka kol ha ka minit kaba 18′, 26′, 28′ bad 63, katba u Donlad Diengdoh ula thep ia ka kol ha ka 20, 39, 70 bad 90 minit.
U Fairming Suting ula thep kol ha ka minit kaba 73 bad 85 bad u Batskhemlang Mawlong ula thep ha ka minit kaba 22, u Robertson Khongriah ula thep kol ha ka 56 minit, u Overkindness L Mawnai ula thep kol ha ka 58 minit, u Banraplang Pyngrope ula ioh thep kol ha ka minit kaba 78′, u Romarius Laban ula thep kol ha ka 83 minit bad u Brolington Warlarpih ula thep ia ka kol ha ka minit kaba 86.
Ha ka jingialehkai ha Tura, hapdeng ka Chipakkore pyrshah ia ka Atong Matgrik ha ka Group A kane ka jingiakhun kala kut ha ka jingiakhaid da 0-0.
Ha Wahiajer, ka Mawtari Myrdon kala pynrem ia ka Seinbhalang Shkentalang da 3-1 ha ka Group E. U James Warlarpih ula thep ia ka kol ha ka 18 minit bad u Baris Taro ula thep ia ka kol ha ka 39 bad 67 minit’na ka bynta ka Mawtari Myrdon katba u Tip Rasmut ula thep ia ka kol ha ka minit kaba 45+1 ia ka Shkentalang.
