SHILLONG, RISAW 28: U Myntri Rangbah ka jylla u Conrad K Sangma ula pynthikna ban khot iakren ia ki nonghikai SSA ban iatai shuh shuh, hashwa ba ka sorkar jylla kan shim ia ka rai kaba khatduh ha kaba iadei bad ka polisi treikam ban thungkam pura ia ki nonghikai SSA.
Ia katei la pyntip da u President jong ka Meghalaya SSA Schools Association (MSSASA) u Bah Aristole C Rymbai hadien ka jingiakynduh ia u Myntri Rangbah ka jylla u Conrad K Sangma.
Ka MSSASA kala ai por 2 bnai ia ka sorkar jylla ban thaw ia ka polisi treikam na ka bynta ka jingshngaiñ jong ka jingshakri jong palat 13000 ngut ki nonghikai SSA ha ka jylla Meghalaya.
“Ha katei ka jingialang, ngi lah iakren sani bha halor ki katto katne ki mat kiba la pynkhreh da ka tnad pule puthi ha kaba iadei bad ka policy na ka bynta ban ai jingshngain ha ka jingtreikam jong ki nonghikai SSA ha ka jylla Meghalaya” la pynpaw u Bah Rymbai.
“U Myntri Rangbah ula pyntip ia ngi ba ka sorkar ka jongu ka iengskhem bad ka long kaba biang bad katei ka mat bad shen ka sorkar jylla kan sa khot ban iakren bad iatai sani ha kaba iadei bad katei ka mat, hashwa ba ka sorkar kan ioh ban shim ia ka rai kaba khatduh” ula bynrap.
Ula ong, ba ka jingialang kaba la long hynne ka sngi Nyngkong, kala long kaba biang bad kaba seisoh.
“Ngi kyrmen ba ha ki sngi ban wan, ka sorkar kan sa pynmih ia ka policy na ka bynta ka jingshngain ka jingtreikam jong ki nonghikai SSA ha ka jylla Meghalaya kumba la leh da kiwei pat ki jylla kiba don ha ka ri”.
Ula ai khublei ruh ia baroh ki myntri ka sorkar jylla kiba la kyrshan ia ka mat jingdawa ha ka jingialang jong ka kynhun myntri kaba dang shu dep shen ha Resubelpara, North Garo Hills District.
“Ngi lah dep ban pynpaw ia ka jingsngewnguh bad jingai khublei ia ka sorkar hapoh ka jingialam u Myntri Rangbah kiba la ai iaka jingmynjur ban pynjynsur ia ka rta jong ki nonghikai SSA na ka 37 snem sha ka 45 snem, khnang ba kin lah ban ioh ia ka lad ban applai kam sorkar ha kaba iadei bad ka kam hikai naduh na ka Lower Primary shaduh ka Higher Secondary Level,” la ong u Bah Rymbai.
