Shillong, Risaw 26: Ka Raid Laban Sports Social and Cultural Organization hynne ka sngi Saitjain, kala pynkup burom ia ki samla pule kiba pass bha ha ki eksamin bapher bapher da kaba ai ia ka khusnam 21st Meritorious Award 2024 ha U Soso Tham Auditorium, State Central Library.
Ha kane ka sngi, u Chief Secretary ka Jylla Bah DP Wahlang bad u MLA ka South Shillong Bah Sanbor Shullai kila pynkup burom iaki 256 ngut ki samla pule jong ka South Shillong constituency baroh kawei.
Mynta u snem, iakane ka jingpynkup burom la phiah haki 28 tylli ki thup (Caregory) bad napdeng ki 256 ngut, 74 ngut ki samla pule ki dei kiba wan shakhmat eh (First Division) haki jingpule kiba la ioh da ka laptop.
Ka jingpynkup burom ka long ruh ia kito ki samla pule kiba wan naki longiing baduk, kiba duna dkhot met kiba la leh bha haki eksamin bapher bapher.
Haba kren shaki lad pathai khubor, u Bah Sanbor Shullai u la iathuh ba ka jinglut ha kaba sam ia kine ki khusnam kam duna iaka T.30 lak bad ia kane ka pisa la pynmang lyngba ka skhim Special Urban Works Programme (SUWP) bad ka jingkyrshan ki dkhot ka Organization bad ki paralok.
U Bah Sanbor u la ong ba kane ka dei ka sien kaba 21 ba kum u MLA u la lah ban pynkup burom iaki samla ba pass bha haki eksamin bad kumjuh ruh kito kiba la trei shitom ban pass iala ki eksamin.
“Mynta ka kynti, ym tang ngi pynkup burom iaki ba pass bha iaki eksamin hynrei ngi la pynkupburom ruh ia kito kiba samla pule kiba la trei shitom khamtam kito kiba wan naki longiing ba duk bad kiba dkhot met” ong u Bah Sanbor.
Ha kane ka sngi, kaba kham kyrpang ha ka jingpynkup burom ka dei ka jingaiti ia ka Laptop sha ki bahaïing u Samla Nathaniel Wanbanshanlang Sohtun uba la khlad noh na ka jingshah bat ha ka bording ilektrik ha ka jaka pule ha JNV School Mawphlang.
Ia ka Laptop la la aiti da u Bah Sanbor Shullai ha ka kmie u Nathaniel kum ka dak ka jingburom ia ka mynsiem ba la khlad jong une u samla.
