Nongpoh, Risaw 25: Ka Synjuk ki Rangbah Shnong Ri Bhoi District, hynne ka sngi Thohdieng, kala pynkup burom ia u Bah Rayonald Kharkamni kum ka jingsngew burom halor ka jingshah jied jong u ban long kum u Observer ka BCCI.
U Bah Rayonald Kharkamni, Vice President ka Meghalaya Cricket Association bad President ka Ri Bhoi District Cricket Association, u la shah jied kum u wei na ki Observer ha ka BCCI, na bynta ka jingiakhun test cricket hapdeng ka India bad ka New Zealand kaban sdang ha ka 1 tarik Naiwieng ha Mumbai.
Haba kren ha ka jingialang pynkup burom, u President ka Synjuk Bah BB Makdoh, u la pynpaw ia ka jingsngew sarong ba u wei na ki dkhot ka Synjuk u la ioh ia ka jingithuh kaba kyrpang ha ka BCCI kaba la ai mynsiem shikatdei ba u riew rangbah napoh kane ka district ban ioh ia kum kane ka jingithuh.
“Ia u phi lah ban bein hynrei kumno phin rad, to shim ia kane ka Jain ryndia kum ka jingpyneh rngiew”, ong u Bah Makdoh haba pynkup ia ka ryndai bad ai ka jingkitbok kitrwiang ia u Bah Rayonald ba un lah ban pyndep hok ia ka kamram kum u Match Observer.
Na ka liang u Bah Rayonald Kharkamni, u la pynpaw ia ka jingsngewnguh ia ki nongialam ka SKRS kiba la shim ia ka sienjam ban ai ha u ia ka bok ka riang hashwa ba un mih na kane ka jylla ban leit sha Mumbai ha ka 30 tarik Risaw.
Ula pynshai ruh ia ka kamram kaba u hap ban pyndep kum u Match Observer bad ruh ia ka thong ba ka MCA bad ka RBDCA ka don ban kyntiew ia ki kam ialehkai Kriket ha kane ka jylla ha ryngkat ka jingiatreilang bad ka BCCI.
