Shillong, Risaw 25 : U Symbud Myntri Rangbah ba khmih ia ka Tnad Transport Bah Sniawbhalang Dhar ha ka sngi Thohdieng, ula ong ba ka Sorkar Jylla ka dang ap ia ka Sorkar Pdeng ban ai dak ha kaban pyniaid ia ka jingthied jaka shuh shuh ha Umroi na ka bynta ban pynheh ia ka kad liengsuin-Shillong Airport.
Haba iakren bad ki nongthoh khubor, u Bah Sniawbha ula ong “Tad hadien ba ngi la ioh dak na ka Sorkar India, ngin sa lah ban pyniaid ia ka jingthied jaka”.
U pyntip ba ka Airport Authority of India (AAI) kala pynpaw ba ka donkam sa kumba 16-17 acre ka jaka na ka bynta ban pynheh ia ka runway bad ki jaka kiban ai jingshngain.
U pyntip ba ka Sorkar kan sa iakren shen ia kane ka kam bad u Myntri ka Ministry of Civil Aviation.
“Ngi la pan por ban iakynduh ia u Myntri ka Sorkar Pdeng. Ngi kwah ban khot ia u ban wan sha Shillong bad lada u mynjur, ngin leit ban khmih hi sha Umroi-kane ka dei ka jingkyrpad jong ngi na ka Sorkar Jylla” ula ong.
Haba kylli, u Symbud Myntri Rangbah ula ong “U Consultant ula aiti ia ka kaiphod ba pynpaw ba ka lynti ka don ban pynheh ia ka kad hynrei ki don katto katne ki bynta kiba hap kyrpad ia ka Sorkar Pdeng ban pyllait noh. Ta ka daw ngi donkam ban iakynduh ia ka Sorkar India sa shisien. Lad aka pyllait, nga tharai ngin sa lah ban shim ia ka rai”.
Kat kum ka jingong jong u, ka jingthied jaka ka dei ka kam kaba hap leh da ka Sorkar Jylla hynrei ia ki jingtei yn hap ban leh da ka Sorkar Pdeng. Ula ong ba kam don satia ka jingduna pisa ban pynheh ia ka kad liengsuin.
