Shillong, Risaw 22 : Ki Pulit Anti Narcotics Task Force (ANTF) ka East Khasi Hills, ha ka sngi Nyngkong, kila ioh kem ia arngut ki snar khaii droks na ka thain Mawryngkneng bad ioh kurup ia bun bah u droks heroin bad yaba tablet.
Kat kum ka jingiathuh u Superintendent of Police, halor ka jingioh khubor ba thikna, ki Pulit ANTF kila iohkem shuwa ia uwei u briew ha Mawryngkneng uba kyrteng u Mastak Ahmed Mazumder ba 26 snem ka rta.
Na une u briew, ka ANTF kala ioh kurup haduh 5 tylli ki synduk sabon ba don u powder rong stem ia uba la suba jur ba dei u heroin, uba khia haduh 56.93 gram. Nalor kane, kila kurup ia kawei ka mobile phone, ka EPIC, ka PAN Card bad kawei ka pla iong.
Hadien kane, ki Pulit ANTF kila ioh kem sa uwei u snar khaii droks ba kyrteng u Hanif Ahmed Laskar ba 29 snem ka rta. Na une u briew la ioh kurup ia ka pla plastic ba thep haduh 196 tylli u droks yaba tablet uba khia 19.16 gram nalor ka Mobile phone, ka EPIC bad PAN Card.
Ki Pulit kila register case ia kine ki briew ha Mawryngkneng Police Station hapoh ki kyndon ka NDPS Act. Ka jingtohkit mynta kala iaid shakhmat.
