Nongpoh, Risaw 21 : Ki Pulit Special Team ka Ri-Bhoi District, kila kem ia 4 ngut ki Nongialam bad dkhot ka seng Meghalaya People’s Federation (MPF) bad Hynniewtrep National United Federation (HNUF) namar ka jingdonkti ban lum pisa be-ain na ki dukan jong ki bar Jylla ha Ri-Bhoi.
Kat kum ka jingiathuh u Superintendent of Police ka District Jagpal Singh Dhanao, kine ki 4 ngut ki dei kiba tip kyrteng u Rangsngur Warjri uba kam ialade kum u President ka MPF bad HNUF lem bad 3 ngut kiba kyrteng u Simon Jyrwa, Alton Wahlang bad Francis Wahlang.
U iathuh ba ki Pulit kila ioh jingtip ba u Simon Jyrwa lem bad ki paralok jong u, kila iasuhbuit ban dawa pisa na ki nongkhaii bar jylla ha Ri-Bhoi District ban pynmih pisa ia ka seng bala tip kum ka Hynniewtrep National United Federation (HNUF).
U pyntip ba halor kane ka khubor, ula buh ia ka Special Team ban peit pyrman ia ki kam bymman jong ki dkhot ka HNUF bad ha kane ka jingpeit pyrman, kila ioh kem ia u Simon Jyrwa, Alton Wahlang bad u Francis Wahlang katba ki dang lum pisa na kawei ka Dhaba ha Pahamri-oh Nongpoh. Ia kine ki briew la kem ha ka por 2:10 baje janmiet.
Ha ka jingtohkit, kine ki lai ngut kila phla ba kila leit lum pisa halor ka jingbthah jong u Rangsngur Warjri uba kam ialade kum u President ka MPF bad ruh u President ka HNUF.
Halor kane ka jingphla, ki Pulit kila leit kem ia u Rangsngur a Umsning halor kane ka kam bymman.
U SP u pyntip ba u trai ka Dhaba namar ba u dei u bar jylla, ula kyntait ban ujor ejahar namar ka jing sheptieng ioh shah thombor ha ki samla ka thain, kaba lah ban ktah ia ka kamai ka kajih ha ka dhaba.
Namar kata, ki Pulit kila register hi dalade da ka suo moto case pyrshah ia kine ki 4 ngut hapoh ka Nongpoh Police Station bad ka jingtohkit ia ki, kala iaid shakhmat.
 bad Hynniewtrep National United Federation (HNUF) namar ka jingdonkti ban lum pisa be-ain na ki dukan jong ki bar Jylla ha Ri-Bhoi.){kind=link}