Shillong, Nailar 20 : Ka Malki ka la ioh ban pynliem haduh 4-2 kol ha ka jingiakhun pyrshah ia ka Ryntih SC ha ka lympung ialehkai jong ka Shillong Premier League kaba long ha kane ka janmiet sngi Saitjain ha madan Third Ground, Polo.
Ha katei ka jingiakhun, ka Malki ka la shah thep haduh 2-0 kol tang ha ki 20 minit jong ka kylla step lyngba ki kol ba la ioh ban thep da u Sanborlang Marwein tang ha ka minit kaba nyngkong bad ia ka kol kaba ar pat da u Kordor Dkhar ha ka minit kaba 17. Hynrei ka Ryntih khlem ailad tang ha ka minit kaba 42 ka la ioh ban pynphai noh shi kol lyngba u Sheen Sohktung bad ha ka minit kaba 45+1 pat lyngba u Bandonkupar Marbaniang kaba pyniakhaid syndon ia ka jingiakhun tang ha ka kylla step da mar 2-2 kol.
Ha ka jingiakhun jong ka kylla ba nyngkong ka Ryntih ka la ioh ban pynliem haduh 3-0 kolo ia ka Malki kaba long ha ka 17tarik Jylliew hynrei ka jingiakhun ha kane ka sngi ka long pynban mar khongpong.
Kumta da ka jingjop ha katei ka sngi, ka Malki ka don mynta ha ka kyrdan kaba 7 da ki 7 point bad ka Ryntih pat ha ka kyrdan kaba 4 da ki 14 point.
Ka jingiakhun ha ka sngi Nyngkong pat kan long hapdeng ka Shillong Lajong kaba don ha ka kyrdan kaba san da ki 11 point pyrshah ia ka Mawlai kaba don ha khlieh duh jong ka miej ia khein point da ki 23 point. Ka jingiakhun ha ka kylla kaba nyngkong ka la kut da kaba ka Mawlai ka pynliem da 1-0 kol.
