Shillong, Nailar 20 : Ka Dorbar Shnong Mawbah hynne ka sngi ka la plie ia u mot dur Jisu ba la pynieng ha katei ka shnong ryngkat bad u Mawbah.
Ia kane ka jaka ba la buh ia u mot la pynbha bad pynitynnat da ka jingiarap ba la pynioh da u MDC, u Bah Mitchel Wankhar lyngba ka skhim na Khasi Hills Autonomous District Council (KHADC).
Hashwa ban plie ia une u mot dur Jisu la ioh ruh ia ka jingduwai jingkyrkhu na u Parish Priest ka Mawprem Parish, u Fr. Edwin Kahit ryngkat ka jingdonlang u Rangbah Shnong Bah David Syiemlieh, nangta kiwei ki nongialam shnong bad ruh ki paidbah.
Na ka liang u MDC ha ka jingkren ba lyngkot u la pynpaw ia ka jingkmen bad ka jingsngewtynnat ban iohi ia ka jingiatylli ha katei ka shnong, namar ka dei ka shnong kaba khleh jaidbynriew bad ki niam. “Kane ka jingiatylli kan pynpeitmat bad pynpei phang ruh ia kiwei ban don ka jingiatylli ha ki shnong ki thaw,” u la ong.
Da kaba pynkynmaw ia ka jingtrei borbah jongka shnong ha ka por ka jingiakhun ia ka thma COVID, u Bah Mitchel u la ong ruh ba ryngkat ka jingiatrei lang bad ki, ki la ioh ban sam bun ki song jingiarap sha ki nongshong shnong katei ka thaiñ ha katei ka por jong ka khlam.
Halor utei u mot pat u ong ba ka jingiakren ban pynbha bad pynitynnad shuh shuh ia utei u motdur kadei hadien ba na ka shnong ka la wanrah ka jingkyrpad bad ma u ruh khlem pynslem u la pynurlong. U la iathuh ruh ba da ka jingtreilang bad ka shnong ki la ioh ruh ban buh ia ki street light bad ruh kiwei kiwei ki tira ba donkam ha shnong kynthup naduh ki lynti iaid kjat.
Na ka liang ki nongialam shnong ruh ki la pynpaw ia ka jingkmen kaba khraw ba ki la ioh ban pynitynnad shuh shuh ia utei u dur mot lyngba ka jingiarap jong utei u MDC.
