Shillong, Risaw 17: Ka Ryntih FC bad ka Shillong Lajong FC kila jop ha ki jingiakhun ki jongki ha ka OC Blue Shillong Premier League 2024 da 3-0 bad 4-0 kaba la long ha SSA Stadium ha First Ground, Polo, hynne ka sngi Palei.
Ka Ryntih kala pynliem nyngkong iaka Nongthymmai SC hashwa ba ka Lajong kan pynliem ia ka Langsning FC.
U Deibormame Tongper ula ioh iaka hat-trick kaba nyngkong ha kane ka samoi ialehkai ha kaba ula ioh thep ia ka kol ha ka minit kaba 34,39 bad 72 minit katba u Kynsaibor Lhuid ula ioh thep ia ka kol ha ka minit kaba 21, ka Lajong kala lah ban pynjem khnap ia ka Langsning ha baroh ki liang.
U Deibormame, udei u Top Scorer ha ka SPL 2023 bad hynne ka sngi ula thep 2 kol tang hapoh 5 minit.
Watla ka Lajong kala tam da 3-0 ha ka kylla step hynrei ki rangialehkai kim shym la sangneh ne kynran dien noh hynrei kila bteng ban ialehkai bha bad kila ioh thep sa 1 kol ha ka kylla miet.
Hashwa katei, ka Ryntih kala ioh thep 3 kol shiteng kynta shwa ban wai ka jingiakhun ban ioh rah ia ka nam ka jingjop pyrshah ia ka Nongthymmai.
Ia kitei ki kol la thep da u Yami Longvah ha ka minit kaba 62, u Dameki Khongstia ha ka minit kaba 76 bad u Wanshanlang Dkhar ha ka minit kaba 86.
Ka jingiakhun ha ka kylla step kala kut haka jingiakhiad ha kaba ym shim la don kiba la lah ban thep kol, hynrei dei tad ha ka kylla miet ba ka Ryntih kala ioh ban pynliem ia ka Nongthymmai.
Ha ka sngi Thohdieng kan don tang kawei ka jingialehkai hapdeng ka Rangdajied United FC kaba la wan baar bad ka Mawlai SC kaba dei ka lahduh jong u snem ba la dep bad kane ka jingiakhun kan sdang ha ka por 5:30 nohphai sngi.
