Shillong, Risaw 17: Ka Centre for Social Audit jongka National Institute of Rural Development and Panchayati Raj (NIRDPR) kala pynbna ban wan 5 sngi sha Meghalaya naduh ka 21 haduh ka 25 tarik u Risaw ban iasam ia ka jingnang jingtip halor ka Social Audit ha State Institute of Rural Development (SIRD), Nongsder.
Kane ka prokram kadei kaba lai na ka bynta u snem mang tyngka 2024-25 kaba la pynlong da ka NIRDPR, da ka jingthmu ban pynbiang ia ka jingioh jinghikai mar kylliang bad ban ia sam lang ia ki jingtip hapdeng ki nongiashimbynta na kylleng ki jylla bad union territory.
Kane ka jingwan jngoh kadei kaba la prat lynti da ka Meghalaya Society for Social Audit and Transparency (MSSAT).
Ki nongiashimbynta kin ioh ia ka lad ban iamir jingmut bad ioh jinghikai na ki sienjam kiba la seisoh halor ka social audit kiba la pyntreikam ha Meghalaya.
Ki nongiashimbynta kin ioh ban iakynduh bad kiba donbynta ha ka kam, ban sngewthuh bniah ia ka rukom leh ia ka social audit bad ki sienjam kiba la noh synniang ia ka roi ka par ha ka jylla.
Kane ka prokram kadei kaba la pynwandur ban don ia ka jingiakren kaba seisoh, kaba iaid ryngkat bad ka Mission jong ka NIRDPR ban tei ia ka jinglah bad jingtbit ki nongiashimbynta.
Kane ka jingwan jngoh ka pyni ruh ia ka jinghimkhia ka NIRDPR ban wanrah ia ka jinghikai kaba iar ha kaba ki jylla kiba iashimbynta, ki lah ban sam mar kylliang bad pynshlur mar kylliang na ka bynta ban ioh ia ka roi ka par kaba neh bad kaba mar katjuh.
