Shillong, Risaw 16: Da ki ummat kiba lang ha ki khmat bad ka jingsngewsih, ki khynnah skul barim jong ka St. Edmunds, Shillong ha ka sngi Balang, kila ai khublei khatduh ia u Nonghikai ba ki ieid thep mynsiem u Brother Eric D’Souza ba ju ia khot ieid kum u “Dasu”, shuwa ban leit ontep ia u ha u lum jingtep jong ka Balang Katholik Laitumkhrah, Shillong.
U Brother D’Souza, uba la thiahpang ha jingthiah namar ka jingpang supranuclear palsy, u la khlad noh ha ka Sngi U Trai ha ka por 1:20 p.m ha Shanti Niwas, kaba don hapoh ka phyllaw jong ka Balang Regina Mundi ha Vasco, Goa. U la dap 74 snem ka rta.
Ia ka met ba sah jong utei u nonghikai la wanrah sha Shillong ha ka sngi Ba-ar bad la buh ia u ha St. Edmund’s School Chapel, ha kaba la pynlong ia ka Mass ontep ba kyntang da u Archbishop jong ka Shillong, Most Reverend Victor Lyngdoh, ha ka jingiadonlang kiwei pat ki Bishop, ki Lyngdoh bad baroh arngut ki khynnah skul kiba mynshuwa bad kiba mynta jong ka Skul St. Edmund, ha kaba u Hynmen D’Souza u la hikai la bun snem.
Napdeng kiba la wan ban ïashim bynta ha kane ka jingïaseng duwai ki kynthup ruh ia u Myntri Rangbah ka Jylla Meghalaya, Conrad K. Sangma uba dei u samla pule barim jong u Brother D’Souza ryngkat bad ki para klas jong u ha St. Edmund’s School.
U Brother D’Souza, uba dei u dkhot jong ka Khristan BrothersCongregation, u la pawnam namar ka jingaiti lut jong u ha ka pule puthi bad ka jingseng ia ka Providence School – ka skul na ka bynta ki khynnah kiba duk, ha ki snem ba u la hikai ha St.Edmunds.
Haba plie ia ka skul Providence ha u snem 2000, u Brother D’Souza u la ong, “Ngi ngeit ba ngi la iohi bad iohsngew ia ki jingdonkam jong ki khun jong ngi kiba im hapdeng ka jingduk bad ngi la aiti ia lade ban jubab ia ki jingdonkam jong ki.”
Ka thong jong u ka long ban pynkupbor ia ki khynnah kiba duk da ki sap ki phong ki ban pynlong ia ki ban lah ban pyndap pynbiang ia lade bad ban kyrshan dalade ialade.
U dei ruh uba nyngkong eh napdeng ki nong India ban thoh ia ka kot shaphang ki kor kompiwtor ba la ai kyrteng “chipping in” ha u snem 1988.
Uwei na ki samla pule jong u Brother D’Souza, u aktor Bollywood u Shah Rukh Khan u la ai burom ia u Brother D’Souza namar ka jingpynwan dur ia u ban long kumba long mynta. U Brother D’Souza u la hikai ia u Sharukh Khan ha ki snem ba u dang rit ha ka St.Columba’s School ha Delhi.
Une u aktor ba pawnam ha ka pyrthei u la pynkynmaw ïa ka jingktah jong u Brother D’Souza ïa ka jingim jong u ha ka bynta ba nyngkong jong ka chat show jong ki snem 2000 bala ai kyteng ka ‘Jeena Isi Ka Naam Hai’, kaba la pynïaid da u aktor ba la khlad noh u Farooq Shaikh. U Khan u la batai ia u Brother D’Souza kum “u nonglam jingshai” ia ka jingim jong u bad “u briew uba u phaikhmat eh”.
