Lakhimpur, Nailar 20: Ki pulit ka Assam hynnin ka sngi Thohdieng kila ioh ban pyllait im ia iwei i khunlung ba dang kha iba la shah die noh ha la u jong u kpa hapoh Lakhimpur district ka Assam.
Ki khubor ki iathuh ba ia ine i khunlung la ioh ban pyllait na ka iingsah jong uwei u riew niam uba kyrteng u Krishna Kamal Upadhya uba shong ba sah ha kane hi ka district.La kynnoh ba u kpa jong ine i khunlung ia uba la tip kyrteng kum u Suren Gaur u la die noh ia ine i khunlung da ka jingiarap jong kawei ka longkmie.
Ia ine i khunlung la kha ha ka 11 tarik mynta u bnai hapoh ka hospital kaba don ha ki bynta jong ka Gohpur.Na ka liang ki bor pulit mardor kila pynlong ka jingkhynra hadien ba u kpa uba la shah kynnoh donkti ula leit ban ujor hapoh Gohpur Police Station.
Kumjuh ha kawei pat ka jingjia kaba la jia ha ka 17 tarik mynta u bnai, ki bor pulit ka Assam kila ioh ban pyllait ia kawei ka khynnah kynthei 13 snem rta ia kaba la kynnoh ba kala shah rahbor ha uwei u nonghikai skul sorkar hapoh Dhubri district.
Katkum ki khubor, la ong ba une u nonghikai ia uba la tip kyrteng kum u Zakir Hussain ula don hapdeng ka jingphet rieh halor kane ka jingjia.U Hussein la kynnoh ba ula khroh la kjor ia kane ka khynnah rit bad ialam ia ka sha ka iingsah uba haiing jong u, u ba kyrteng u Moijuddin ha ki bynta jong ka Ananda Nagar kaba hapoh Bilasipara.
Kane ka jingjia ka la paw pyrthei hadien ba kiba haiing hasem jong kane ka khynnah kila leit ban ujor hapoh Bandihana police station ha Dhubri district.
Hadien kane ka jingujor, na ka liang ki bor pulit kila thaw ia ka kynhun bad pynlong ka jingkhynra tad haduh ba kin da ioh ban pyllait ia katei ka khynnah na Krishan Nagar.
Kham hashwa, hadien ba ka kyrteng jong utei u nonghikai ka la mih paw halor kane ka jingjia, na ka liang ki paidbah kiba don hapdeng ka jingbitar ha tyngkat ki kmie ki kpa jong kane ka khynnah kila leit khynra sha ka iingsah uba haiing jong u Hussain ha Ananda Nagar.
