Shillong, Nailar 19: U Myntri Khynnah ki kam pohiing u Ajay Kumar Mishra hynne ka sngi ula pyntip ba ka Sorkar Pdeng kam kwah satia ban pynjari ia ki Ain bapher bapher ha ka thain Shatei Lam Mihngi kynthup ka Armed Forces Special Powers Act (AFSPA), 1958 – kiba long pyrshah ia ka mon jong u paidbah haba kyntu pat ba donkam ban sngewthuh ia ka jingmut jong ka Citizenship Amendment Act (CAA).
Kane kala mih hadien ka jingiakhih jong ka North East Student’s Organisation (NESO) ha baroh ki 7 tylli ki Jylla ka thain Shatei Lam Mihngi ba dawa ia ka sorkar pdeng ban pyntreikam noh ia ki 12 tylli ki mat jingdawa ba kynthup ia ka ILP, ka jingpyndam noh ia ka AFSPA bad ka CAA.
Haba kylli, u Mishra ula ong ba ka Sorkar Pdeng kala nang jam suki jai sha kata ka lynti namar ki don ha ki katto katne ki jaka ba ka Sorkar Pdeng ka la dep ban weng noh ia ka AFSPA hadien ba wan phai ka jingshongsuk.
“Kino kino ki ain kiba long pyrshah ia ka mon u paidbah yn sa weng noh namar ngim kwah ban buh ia kum kine ki ain” ula kular.
“Hynrei ha kajuh ka por, ka jingsuk ka dei ban don ha kane ka thain bad ba kam dei ban don ka jingpynthut ia ki kam pynroi. Ka Sorkar Pdeng kan sa shim rai ia kane hadien ka jingtohkit kaba bniah ia ki jinglong jingman” ula bynrap.
Halor ka jingdawa ban nym pyntreikam ia ka CAA ha Meghalaya bad kiwei ki Jylla ka thain Shatei Lam Mihngi,u Myntri ula ong ba tang kito ki bym sngewthuh ia ka jingmut jong ka CAA ki dei kiba pyrshah.
“Hynrei ngin sa pynsngewthuh ia ki namar ngim pat shna satia ia kiwei pat ki ain ba thymmai. Ka CAA ka dei ka ain ba don naduh u snem 1955 bala thaw da ka Sorkar ha katei ka por na ka bynta ki nongshongshnong. Ngi lei ngi shu pynkylla ia ka bad kam dei satia kaba treikam ia ki Nongshongshnong ka Ri” ula ong.
U Mishra ula pynksan ruh da kaba ong “Ka jingpynkylla kaba ngi la wanrah ka dei tang ia ki ritpaid na Pakistan, Bangladesh bad Afghanistan. Lada ki rit paidbah na kine ki Ri ki wan sha India shuwa u Nohprah 2014, kin ioh ia ka hok long Nongshongshnong bad da kane ka mut ruh ba yn ym don pat ki nongshongshnong ka Ri ki ban duh noh ia ka hok lane long Nongshongshnong”.
Haba kyntu ia ki Sengbhalang ba kin sngewthuh ia ka jingmut jong ka CAA, u Mishra ula ong “Ki dei ban sngewthuh ba kane ka Ri ka dei ka jong ki bad ruh ban burom ia ki nongshongshnong jong ngi kiba jah ha kiwei pat ki Ri lane kiba mad ia ki jingeh bad mynta ki wan phai biang sha India”.
Halor ka jingkynnoh jong ka Liang Pyrshah ba ka Sorkar NDA kala pyndonkam ia ka Enforcement Directorate ban khynra ia ki kam bamsap, u Mishra ula ong “Kaei kaba phi mut ban ong ba ngi pyndonkam ia ka ED?. Ha kine ki phra snem palat T 1 lak 15 hajar klur ka pisa bad nongkynti la kurup da ka ED na ki briew kiba la lute ia ka pisa ki paidbah da ki phew phew snem”.
“Kine kiba ngat ha ka ED ki dei kiba khaii ia ki crypto currency bad ka BJP kam shym la pyndonkam satia ia ka ED ne ka CBI bad kam ju tuklar ruh ia ka kam jong ki. Hynrei kiba donkti hi ha ki kam bamsap ki dei ban shah pynsajia kat kum ka ain” ula ong.
Ha kajuh ka por, u Myntri ula pynpaw ia ka jingsngewskhem ba ka BJP kan sa thaw ia ka sorkar ba thymmai ha Jylla Meghalaya.
